D ayen i d-yettuɣalen dɣa tal tikkelt lawan-a, ama deg ulzuz (ssuq) aɣerfan, neɣ d winna amecṭuḥ n taddart. Kra n win yesɛan tiqeḍɛiyin-a n wulli ed wakraren, ur yesruḥu ara tagnit ad yessali ɣer yigenni ssuma n yiwen n uqerruy ilmend n lɛid tameqqrant i d-iteddun s yisurifen iɣesben, iɣezfanen. D ayen i yeǧǧan dɣa iẓawaliyen i ur nesɛi ttɣiman kan weḥlen ccettkayen ansi ara asen-d-yekk udrim i tiɣin n tesɣit n lɛid ? Ladɣa imi tameɣra-ya ass-a, llan wid i tt-yegren deg umuɣ n tigawin i yettafaren tasreḍt, wiyaḍ deg winna i yettabaɛen ansay ed tannumi. Daymi i yewɛer ɣef yiwen d aẓawali ad yeqqim akken ur izellu ara war ma iɛeyyed am netta am medden merra, deg tmetti ideg simmal ttuqan wid i yettarran ddhen i umeɣbun. Deg waya ihi, yewɛer s tidet ad iqerreb yiwen ssuma n yikerri imi ulac win i d-isubben seddaw n tlata n yimelyan ma yerxes, rnu ad t-tafeḍ d ameẓyan ur irebba ulama d atentuf n tassemt. Ini-d ɛad i umdan i yessaramen ad iɛeyyed akken iwata s yiftaten ed yikanifen, iban yuɣ lḥal belli ma ur yessufeɣ nnig xemsa n yimelyan ur yettawaḍ ara lebɣi-s. «Ur rǧiɣ ara almi d ussan-a deg ikennef wazal n yikerri akken ad d-aɣeɣ tisɣit, rnu mbeɛd xilla n yinezgumen. Aya yeḍra-d yakan send remḍan s ssuma tettwaqbal.» I aɣ-d-yenna yiwen n umezdaɣ n Ayt Smaɛel. Deg tegnit-a ihi ideg lɣaci ttazzalen ad d-heggin ixef n lɛid, yelha yiwen ma ixemmem i wid icedhen aksum akken xersum ad asen-d-isiḥ deg wass n lɛid. Ula d tidukkliwin neẓra ad ilint tid ara ixemment ɣef twaculin i ur nesɛi ttawil n tudert bac ad ɛeyyden.
Mhenni Xalifi