Di teswiɛt anda imḍebbren n tmura yak n umaḍal kkaten akken ad sefken i wegdud yak ayen yehwaǧ di tudert-is n yal-as, wid-nneɣ zzin-as s waɛrur. Yufa-d iman-is yettemceččaw weḥdes lak d dunnit. Win yetfen amkan-is ad yettu ansi d-yekka d wayen iɛuhed ad t-yexdem I winna t-yessawden ɣer wayen yebɣa. Agdud yettidir did del d tgullelt ur nettfakka fell-as. Ula d tissutiwin d-ileḥun yettwahegga-yasen-t umur-nsen-t. Ihricen yak n tudert ikcem-iten “burekku”. Ulac tama yessefrahen. Tin ara yefken afud i wegdud , ladɣa ilmezyen yettalin taslent s waɛrur. Ur ten-id-isah wacemma. Ula d aɣerbaz ur sen-d-yetthelli ara ayen ttmennin: axeddim. Imdanen yeffeɣ usirem deg wulawen-nsen. Tilelli n wawal, llebsa, uxemmem, d tudert, akken yeqqar Matoub deg wawal-is “ur tt-id-nettader”. Terwi tebbarwi, ixef-is d lmuhal ad d-ibin. Yal ass yif-it win yezrin. Yal win d-yusan yebbi-d yid-es tarzeft n iɣeblan yeskawayen afud n wid yebɣan ad rren tilist I ddel yessexbibiḍen yeqqar mazal tamurt, Lezzayer, yessawḍen s tebɣest ad yessufeɣ yak imnekcamen d-yusan akken ad s-erren tazaglutt w’ad tt-arren daɣen d ayla-nsen. Maci d yiwen neɣ sin I yerran aḍar mi faqen d akken agdud azzayri maci d win ara iqeblen tudert n ddel. Tiwriqin n umezruy smektayen-t-ed ayen yak yesber wegdud iwalan yak ǧuṛ umu yezmer urumi. Timunent tedda-d s idammen d lerwaḥ n watas n yemdanen yeɣlin d asfel akken nekni, tarwa-nsen, ur nettidir ara ayen dren nutni. Akken ad nerfed tamurt-nneɣ. Akken ad necbu iɣerfan n tmura nniḍen. Akken ad nidir di tlelli …deg tmurt-nneɣ. D wagi I d asirem n lejdud-nneɣ. D wagi daɣen i d azref n yal yiwen d yal yiwet yettidiren deg tmurt ur nelli ara ddaw n uzaglu aberrani. Akken yenna Lwennas deg wawal-is “62 ma ad sen-cfu, Nɣil d amzeyyed n lehna, Nerfed leɛlam ncennu aqlaɣ nessufeɣ Fransa, Bu waɛmam assen id-ten-ettu, Yesmar burekku yessenteḍ di yal tama,…” tamurt yewwi-tt wasif, maca “ ilaq asirem ad yili, deg wulawen ad yefti, xas akka lwaɛd ay teqqes», id d-yenna Lwannas. Ala asirem id d-yegran I wegdu umu rzan afriwen. D wagi kan isen-d-yegran akken ad qablen yess az.
Fatiha.k