Yella-d waya ussan iɛeddan, d tikti i tceyyaɛ Tdukkla n Yimeɛḍar ed Yimuḍan Idumen Tiɣri deg yiwen n wulɣu i tɛelleq deg kra n yimeḍqan, i win yebɣan ad sɛeddin akk warrac, war tasureft, aseggas aɣerbazan akken ilaq, s uqrab iwatan ara yesfeǧǧeǧen ulawen-nsen. Ad d-nesmekti dakken asiwel-a yella-d ladɣa i walmend n warraɛ imeɛḍar, neɣ imuḍan n kraḍ n yiswiren n uɣerbaz, maca ma yella ttwagrawen-d ddeqs ttfaḍlen-d ɣer taggara, ula d arrac nniḍen yezmer ad sfaydin s tdukkli-ya n ulqaḍ n yiqraben, imi tuɣalin i tɣuri leḥḥment-d (ttaẓent-d) rennunt. I kra n win yebɣan ihi ad yekki deg tigawt-a igerrzen, i yerzan akk inelmaden n tɣiwant n Ayt Smaɛel, yezmer ad yessiwel ɣer walbaɛḍ n wuṭṭunen n tdukkla-ya, am wuṭṭun n uselway-is mass Ɛebdun Smaɛil 0772 41 80 86, i win n mass Zemmuri Yusef 0553 32 55 03, neɣ i win n Ɛebdun Ɛmer 0772 85 76 79. Neɣ ma ulac ad yerzu ɣer uxxam n tdukkla-ya deg wul n tɣiwant. Aya yesɛa tiliset deg wakud, imi yewwi-d ad d-yili send 31 deg wayyur-a n ɣuct deg nella, azemz aneggaru n umgar n yiqraben. Ad d-nefk aneɣmis dakken tidukkla-ya d tilemẓit aṭas, ma neẓra tewwi-d ttesriḥ-ines unsib akkin i wayyur n mayu yezrin, maca seg wass-nni tella d turmidt s ddeqs, rnu war tirmit ar tura, mi tesuddes aṭas n ttiɛadat i ubaɣur n umeɛḍur ed umuḍin. Tikti-ya, akken i aɣ-d-yenna uselway n tdukkla-ya i d-nebder, aṭas-aya nettat deg wahil imi zgan d axemmem ɣef uḥric-a n medden i yellan deg temdaddurt n yiswan n tdukkla-nsen, daymi dɣa ɛeddan fesren-d tiɣri i kra n win yebɣan ad iɛiwen s kra neɣ d kra.
Mhenni Xalifi