Aneɣlaf n tezmert d useggem n sbiṭarat, Mass Saɛid Barkat, yenna-d deg tirza yewdem deg Wehran, i tikelt tis snat deg sin n wussan, ala 5 n yimdanen i yeṭṭfen tawla n yilfan (grippe porcine A/H1N1). Yerna daɣen, 34-nniḍen, cukken kan deg-sen aṭṭan-a, atni deg sbiṭar, ur asen-ttserriḥen ara almi iban d acu-t waṭṭan-nsen.
Deg Wehran, ar ass-a d taneggarut, d yiwet n teqcict yesɛan 13 yiseggasen deg leɛmer-is, i d-yekkan seg Fransa s lbabur, ṭṭfen-tt deg sbiṭar imi s tidet yuɣ waṭṭan-a, mazal la ttdawin deg-s seg wass n 29 yunyu. Amezwaru i d-iban deg Lezayyer, yuḍen tawla-ya d tameṭṭut i d-ikecmen ass n 20 deg yunyu, tewwi-id yid-s snat n yessi-s, tekka-d seg Miami (USA) deg tmesrifegt n Lufthansa tɛedda-d seg unafag n Franckfort (l’Allemagne) almi d-tewweḍ ɣer unafag Houari Boumedienne deg Lezzayer. Amek akka, seg Marikan ɣer l’Allemagne d ttawilat i yesɛan, ur faqen ara tuḍen tmeṭṭut-a ? D asteqsi n yiwen n umejjay deg l’Institut Pasteur n Lezzayer. Sin n wussan, yessi-s n tmeṭṭut-a banent-d uḍnent. Rnu ɣur widak-a yiwen i d-ufan daɣen deg unafag n Houari Boumediènne, yekcem-d seg Fransa. Mass Saɛid Barkat, aneɣlaf n tezmert d useggem n sbiṭarat, yenna-d seg Wehran : « tamurt n Lezzayer tessaweḍ l’alerte ɣer t-6. 100 n sbiṭarat s ttawilat-nsen i yettuheyyan akken ad ddawin wid akk ihelken s tawla n yilfan A/H1N1. Terna lḥukuma n Lezzayer tesbedd-d yiwet n tesqamut de crise ɣur uɣlif n tezmert ara ilethin i iḥesses d tɛessast n lehlak-a. » Deg ddunit, azal n 106 n tmura i tt-tḥaz tawla-ya. Gar tid i ineṭṭerren nezzeh d Marikan. Tamurt-nneɣ,; yekcem-itt-id waṭṭan seg berra ɣas akken ulac anafag ur nesɛi tarbaɛt tettɛassa anagar later n lehlak-a deg yiminigen.
Dj. Ikhloufi