Niḥqa tikwal ttilint-d kra n tezlatin i yettmeslayen i medden akken llan, meẓẓi meqqer ttwaḥuzan seg-sent, seg wakken ttwiqqirent d aḥulfu, sser akked tezdeg. Tizlit n Karima « A yemma »s yimeslayen n Kamal Ḥemmadi, d yiwet gar tezlatin akk i igerrzen seg tid n tejmilin i tyemmat. Ɣas asentel-is amatu d accetki n tyellit i tyemmat, maca s taɣect-nni yuqan n tin i tt-yecnan akked yimeslayen-nni iweznen n yiwen i yellan gar yimezwura i yefkan iḍrisen n ccna, izli yessawaḍ yettelɛa aḥulfu n yal yiwen seg-neɣ.
A yemma lukan ufiɣ
Deg yirebbi-im ard am-ɣliɣ
Ahat ad kem-ɣiḍeɣ ass-a
Sdaxel n wul-iw rɣiɣ
Ula d ddwa ur tt-ufiɣ
Annaɣ a yemma tasa !
Karima da, tewwi-d tizlit n yal akud ur nettmettat, tesbeyyen-d annuz-nni ameqqran i tuklal tyemmat, akked ddwa i d-yettak urebbi-is yeḥman, yeččuren d leḥnana. Am wakken d taxerḍuḍt i yettaf yal yiwen seg-sen bac ad yesfeḍ imeṭṭawen-is. Deg tsetna-ya, Karima teqqar-d s uqaɛ n lejruḥ-is d acu i ddwa-s sdat iɣeblan; dakken arebbi n yemma-s mazal tẓerr-it d aɛecciw n leḥnana, n talwit, ed wayen akk itekksen urrif d lmeḥna.
A yemma, a win kem-yufan
Ad am-ḥkuɣ lbaḍna
Deg yirebbi-m am llufan
Yelli-m tuḥwaj leḥnana
Nɣan-iyi, lxiq d wurfan
Deg wul ur sɛiɣ ṭṭmana
Deg tmejrut-a (couplet) tamezwarut, tekcem tin icennun deg wayen tessaram, deg wayen tebɣa, amzun d abuqil i yettɛebbi wul-is. Tenwa ad tebru ulama i cwiṭ n ttɛebya-s yeẓẓayen s uccekti i tin i tt-id-yewwin ɣer tudert. Skud tenṭer seg wurfan ar almi ur as-d-tsaḥ ṭṭmana, ama ɣef-s neɣ ɣef tlufa nniḍen n tudert.
Lemmer teẓriḍ akken uɣaleɣ
Nekk i trebbaḍ s lefcuc
Yemma taḥnint ugadeɣ
Banen-iyi-d medden am lewḥuc
Ddunit-a ur as-zmireɣ
S kra win tḥubbeḍ, ad akem-iɣucc
Annaɣ a yemma tasa !
Yuɣ lḥal da, ad d-neḥsu am wakken aɣilif akk deg temmeɣ tnaẓurt yekka-d seg umdan, skud teḍra-as am tin ifaqen amek yemmug d tidet umdan-a, d wamek i tt-id-yerra. Dɣa tettcettkay i yemma-s imi nettat ur as-tezmir i wannect-nni d tihwawt, d ddɣel, d tismin, ed uɛuffu.
Ziɣ bnadem ul-is d aẓru
Berrik am ṭṭlam n yiḍ
Yettbeddil u yettɣurru
S tsusmi ur yettɛeyyiḍ
Ul-iw aleqqaq yettru
D ameɣbun la yettfeggiḍ
Annaɣ a yemma tasa !
Deg tmejrut-is tis-kraḍ n tezlit i yellan d taneggarut, tsemmed Karima i wayen i d-teqqar yakan deg tis-snat. Degmi tessen-d ugar anwa i d amdan, ed wacu i t-imeyyzen dɣa war ma yeffer. Ma d nettat, am tin yeččan tiyita n wannim-nni merra skud ul-is d afessas d uḥdiq. Tessken-d Karima deg tezlit d acu d nnubu i tezmer ad teṭṭef tyemmat, ed wacu d ddwa-ḥellu i tezmer ad d-tefk lwaḥi ed yiɣeblan n tmetti ixesren.
Mhenni Xalifi