Iberdan xeṣren, ččuren d iḥemalen n waman, aluḍ yessa, abruri « yesderbik » deg lqermud,, issafen ttfeggiḍen, aḍu yettṣuḍu,…s wayagi i d-yegla unaɣur n wass-nni n larbɛa i ɛeddan deg tama n Ṣummam. Imezdaɣ n tama-agi ur walan ara ageffur iǧehden am-agi. Igenni « yeqqarṣ-d » d yimurar n tmiqwa n waman d webruri. Din din, iberdan, ifergan n yixxamen ččuren d-aman n-ugeffur. Aṭaṣ n yixxamen kecmen-ten waman, yiwḍen nnig n 30 isentimitren! Medden trekb-iten tugdi, yagi imi ẓran igenni « yeqqars-d » d-aman. As tini-ḍ d-iḥemmalen, d-icercuren. Kra kan n dqayeq, ddunnit amzun teɣreq deg waman n-ugeffur. Iberdan uɣalen as tini-ḍ d-issafen, ur yezmir ara wemdan aten izger. Tikli n ṭunubilat teḥbes deg kra n yimukan, am Allaɣen, i d-yezgan deg tɣiwant n Tazmalt. Deg taddart-agi maḥsub lḥemla tettili myal tikkelt ad d-tiwwet ugeffur. Mi d-yerna webruri, medden ttaṭafen iɛebbaḍ nsen, acku ẓran belli ixeddem aṭaṣ n lmaḍerra, ama i yixxamen neɣ i tfellaḥt. Cwi, ixxamen menɛen, ulac wid yeɣlin akken i neẓra, maca azemmur yettwaɣ, ma nenna-d tidett kan. Akka, azemmur nni azegzaw, neɣ ammetur, yeɣli s waṭaṣ seddaw tzemrin. Dayen yeǧǧan medden nuɣnan ɣef ayagi. Ma yella ad rnun igeffuren nniḍen a win n larebɛa iɛeddan, ɛla ḥsab ayagi, azemmur ad yeɣli « akkit » ! Dayen ur nessaram ara. Dacu kan, aman i d-yeɣlin seg yigenni dayen yessefraḥen aṭaṣ, ɣas akkeni tella lmaḍerra deg uzemmur. Necfa-d aseggas-nni iɛeddan, imi akal yeqqur azal n waṭaṣ n wagguren, acku igenni « icuḥ » i waman-is! Aseggas-agi, ur ɛad ur d-yekcim umawan neɣ laxrif, tebda lahwa tekkat s ṭaqa. S wakka, tafellaḥt atterf-d iman-is, attili ṣaba, ama d-irden, d ttimẓin, d-igumma neɣ d-izegza, ma tkemmel akka ad yelhu useggas n tfellaḥt ma yebɣa wenẓar !
Syphax.Y