Sliman Ɛazem(1918-1983) amedyaz yerẓan tiwwura n tugdi s wawal d ccna amḥaddi , yecna ɣef tlufa n tmeddurt yiwet ur tt-yezgil timetti (ṣaḥa di lweqt aɣeddaṛ) tasartit (19 di meɣres) idles (ɣef teqbaylit yuli wass) lɣeṛba ( d aɣrib d abarrani di tmura medden) , tizlatin-ines di lwaqt-is ǧǧant later meqqar ɣef tsuta tirni ,aṭas n yilmeẓyen i ḍefren abrid-is di tezlit tamḥaddit am Lwennas MaƐtub d Lewnis at Mengellat d waṭas nniḍen. imi anaẓur-a yennan-d tiqerḥanin asmi Lxuf yegguni tudrin asmi telelli umeslay tella targit, 32 iseggasen mbaɛd lmut-is mazal-it d azamul i kra yellan mgal lbaṭel d wid yugin lqid , tuɣac-is timsirin i wid ifuden taqbaylit.
Ccfiɣ am ass-a ass-mi d-ṛuḥaɣ
Mi d-refdaɣ tibalizin
Ḍfaṛn-iyi-d widen akk ḥemlaɣ
Yemma akked baba d isin
Nitni ttrun ma d nekk ḥeznaɣ
Mi d-nem-sefṛaq ǧiɣ-ten din
Am zun d-lmut ay mmuteɣ
Mi d-iḥaṛ lebḥaṛ akin
Amecwaṛ n Dda Sliman d anesbaɣur ugar n 90 iḍefsiyen akked d uḍefsi n wurraɣ deg useggas n 70 ɣef tesfift-nni yettwasnen nezzah » a win yellan d lfahem » , taqbaylit-is taḥarrit yarnu tecbaḥ akken i d-qqaren wid t-yessnen s lqerb yesdukel anamek lqayen d thuski n umeslay d tmuɣli n umesnaw.
Awin yellan d lfahem
Sfahm-iy-d amek akka
D acu d sebba iniɣem
Mi tezdeɣ deg-s twekka
Sufella yecbeḥ yeṛqem
Daxxel mi t-lldiɣ yerka
Sliman Ɛazem mmi-s n agenni Geɣṛan (Iwaḍiyen) yemmut d aɣrib ɣef tmurt-is iḥemmel ,yemḍel di Moissac di Fransa mačči deg akal t-id-rebban , ulac tizlit anda ur d-yebdir taddart-is neɣ Lezzayer-nni ɣef yennuɣ (iffeɣ ay ajrad tamurt-iw) d teqbaylit-nni imi yarna cbaḥa i yuɣen irgazen ur uklalen.
Tamurt-iw a tin aɛzizen
Ǧǧiɣ-kem mebla lebɣ-iw
Mačči d nekk ay yextaṛen
Akka ay yura di lbext-iw
Nekk zedɣeɣ anda niḍḍen
Ma d kemmini tezdeɣḍ ul-iw
Wissen ahat yiwwas bab n tezlit « ffeɣ ay ajrad tamurt-iw » a d-yuɣal ɣer wedrar n ǧerǧer ad yesgunfu lebda , imi agrud ala deg irebbi n yemma-s i s-d-yettaweḍ nadam.
Seg asmi i d-yexleq zzman
I mmsefhamen lḥiwan
Weḥd-sen ḥedd ur yeẓri
Bab n yiɣil ad d-iban
Ad yuɣal d sselṭan
Yettuɣaḍ win ur nezmir
Dahmani Bilal