’D isem-is, i d lefɛayel-is’’ i qqaren deg umedya. Ihi, tiddukla ‘’Le Défi’’ tjebbed-d tilin-is seg yinzi-a. Mazal wwḍen ɣef tlalit-is sin yiseggasen (tettwaxleq ass n, 28 deg furar 2014), ha-tt-an texdem acḥal d asenfar ladɣa ayen akk i icudden ɣer useḥbiber n tezmert n umdan neɣ n ugama imi aselway-is d ṭṭbib, Dr Kechabia.
Tiddukla-a, mačči am tiyaḍ. Tiddukla ‘’Le Défi’’, telha-d s yal aḥric : timetti, addal, idles akked ugama. Tefka azal d ameqqran, diɣ, i teywelt imi i d-tessufuɣ tasɣunt yal 6 n wagguren. Teqqedec deg wakal n tɣiwant n Irdjen, tesɛa tansa-s deg taddart n Tala Mahriz.
Deg wahil-is, ad naf : tijmilin i Lmulud Mɛemmri, Smail Yefsah d Matoub Lounes…atg, asbeddi n yiwet n temkerḍit tameqqrant anda i bɣan ad rnun yiwen usaly (le musée), aɛiwen n yimeɣban, ladɣa, deg waggur n remḍan, asileɣ d useḥbiber ɣef twennaḍt, temsirin i yinelmaden n yal aswir, isaragen sya ɣer da, timliliyin n waddal akked tmezgunin mebla ma nettu ticemliyin d lewziɛat…atg
Tiddukla ‘’Le Défi’’, d amedya i wid yebɣan ad mmlen abrid yessufuɣen i yilmeẓyen n tmurt. Iɛeggalen-is, jebden-d i uzekka seg wayen yella iḍelli akken i as-yenna Idir ‘’Seg wayen yellan iḍelli ar d-nejbed i uzekka’’.
Afud igerrzen i yal yiwen deg-sen.
Hocine.M