Akud n tleqqaḍt n uzemmur d win i d-ileḥḥmen, kra win yesɛan ṭṭjur yebda deg ccɣel-is. Ulama mazal ur d-yewwiḍ lawan-is, ḥaca jemmɛen-d kan aɛeqqa n lqaɛa i d-yetteɣlayen, bac ur yettwaɛfas ara, wamma asram ed ulqaḍ ur grin deg-s acku urɛad yewwa swaswa…
Wanag tuddar n Ayt Smaɛel, di leɛḍil, ceɣbent meqqar deg uqeddic nniḍen yeɛnan tafellaḥt, am wuẓi. Skud aql-aɣ deg twala n tneqqact ed wuẓi, imezdaɣ n temnaḍt ferrsen lweqt s tḥerci, ččuren akal s lesnaf n yisafaren, am ticcert, aẓalim, ajilban, ibawen, lbesbas, akked wid nniḍen daɣen mu d-yewweḍ ttiɛad n tzerraɛt-nsen. Am yal aseggas ihi, war taffinyent ed ustehzi, mkul yiwen yella d urmid deg umahil-is, imi tamurt d tin inuḥen deg temnaḍt-nsen, ɣas ur s ccyaḍa, lameɛna ur ǧǧin idigan ferɣen. Ayen i d-yettakken tazmert ugar i usenfar-a, dakken mačči anagar timɣarin i ilehhun yes-s amek teḍra deg yiseggasen yezrin, lameɛna tura ula d irgazen ed tlawin rran lwelha-nsen i ɣur-s, dɣa gran s ufus i lxedma fell-as. S tumert akked lebɣi i ttabaɛen imecṭaḥ aqeddic-a n yigeɛmura, ɣas mačči deg lexsas i llan, ɣas ur ttuḥettmen ara ad ẓẓun ɣef tmara, maca ḍefren-t imi ḥsan akal d agerruj, ur yettwawfay kan i lebni fell-as, neɣ i tikli, wanag yella daɣen seg zik d rrehba i wuẓi-nni i d-igellun s lɣella n lɛali, tin yessettawen akk ccqa ed leɛtab swayes yesmurus ccɣel-a. «Uẓi ed tzerraɛt teqqel-aɣ d ddwa tannumi-ines, ɣas ur nesɛa ara xilla n tmurt, maca nteẓẓu ayen yellan, lemmer nla ugar tili nteẓẓu-t kifkif. Acku lɛada-ya tamerbuḥt ur ilaq ad as-nebru», i d-tenna yiwet n tmeṭṭut tasmaɛlant. Ula d iɣermanen (citoyens)i ikesben ireẓẓwan (tiferkiwn) beɛden ɣef yixxamen, zeggren asettum ɣezzif i ɣur-sen skud aɣilif n tissit ad yefru s yigeffuren n tegrest1a i d-iteddun. Akken ur ttaǧǧan ayen i asen-d-ǧǧan yiqburen, bac ad t-slemden i yilmeẓyen daɣen i yegran deg-s yakan. «Ḥemmleɣ aṭas ad xedmeɣ tibeḥyar, lebɣi-agi yusa-yi-d sɣur setti ed yemma i d-ufiɣ teẓẓunt. Ttakkeɣ akud-iw i llhu yes-sent ulama yemmend-iyi-d ubraz daxel uxxam ttezwireɣ seg-sent. Mkul aseggas teẓẓuɣ lqaɛa-w, mbeɛd lɣella-s kra teṭṭfeɣ-tt i yiman-iw, kra znuzuɣ-tt i yimarkantiyen, ma d kra nniḍen ttseddiqeɣ-tt ɣef yimeɣban», i d-tenna yiwet n tselmadt d tilemẓit. Akka ihi taddart n Ayt Smaɛel simmal ifetti deg-s usenfar n tfellaḥt, ula d ṭṭjur n yigumma daɣen ttwaẓẓawent. Nessaram asenfar-a ad yefti deg temnaḍin n Leqbayel merra, acku uẓi ed tzerraɛt d ansay n ubaɣur, mačči n wulac, am win irennun aman i yilel.
Mhenni Xalifi