Teḍṛa-tt d tira n Muḥya akked leqdic-ines am tneqlet-nni n webrid, win kan i d-iɛeddan ad ixarref. Akka dɣa seg-mi yemmut, yuɣal wayla-s d carraɛ neɣ d lmecmel . Kra n win, yenwan iman-is d amuggay( dramaturge) neɣ d amsufeɣ( metteur en scène) yettnadin ɣef taceqquft umezgun ad yazzel ɣer ukufi n Muḥya akken ad yeddem , la ccwer la ḥezzeb. Zzun akken ayen yura Muḥya d ayla n taddart ur nesɛi bab. Awal ɣer wayeḍ ad ak inin at imalwayen-agi ,yedman imextafen, yenwan taẓuri d tazemmurt, cerw-tt-id kan ak id-tefk iɛeqqayen: “d tajmilit i nebɣa as nner i Muḥya deg akken i t-nettɛuzzu. Nekni nettnadi ad nerfed isem-is akken yiwen ur t-itettu.” Xuḍi nutni ayen i ten- yecqan d tadrimt( tin n les subventions id ttawin s ya d s ya) ara d skecmen ɣef ɛrur n win yefnan tudert akken ad yerr lɛez i wawal n teqbaylit. Di tudert-is deg leɛmer inuda ad iɣalet ayen id yesnnulfa , neɣ ad yessekcem asurdi s wayen id yesqucceḍ deg tibḥatin n tsekla d isefra, d tullizin neɣ tinfusin.
Mačči kan d aya , ula d-asmi yedder mačči yufa-d iman-is ɣer rrif , ɛezlen-t widak is yeqqaren nekni tura dayen nessaweḍ? Meɛna deg akken sellaw yifer n iwezlanen-agi, yebɣan temɣer xas bessif, uɣalent timseḍsay timucuha-nsen !
Tefra-tt d Muḥya am Muḥ n Muḥ-nni yedman aqabac xas yeẓra si zik tabaɛ ulac. Muḥ n Muḥ swan tid-is isihranen, Muḥya swan tidi n lmux-is ideɣṛan n tẓuri. Acu- n tajmilit i-ilaqen i Muhya nnig aḥarreb ɣef leqdic-is. Niqal nniɣil u leqrar kra yura, d kra yexdem ad yuɣal deg adlisen ara icebḥen tinedlisin( librairies) tinkeṛḍiyin( bibliothèques), ziɣemma iqerrs-aɣ wul nekni s iyennat-en –agi! Netterggu anṣib deg ixmir. Teḍṛa-tt yid-nneɣ am win yebɣan ad yeṭṭeḍ ilili , neɣ am win yejguglen deg ufruk ameclux.
Akkin akka , zzhir yeṭṭuqet. Kra nwan yisen i tbedd tmurt, kra ɣilen ma ɣaben ad yeɣli igenni, kra sefruyen ad awin tilelli, kra tt-ggalen ur ḥenten ad ɣeḍlen lbaṭṭel, yal wa anwa amendayer yesseḥma akken aɣ yezuzen. Netta ziɣ teḍṛa-tt yid-nneɣ am akken is yenna Lounis Ait Menguellet : “nettnadi ɣef tisura / tawwurt werɛad i tt-nufi!”
Susem kan a wlidi! Id yenna Muḥya. Yak Ṛebbi aɛziz lebṣel qerreḥ, ulamma iggiru yezga ɣef yimi ur nxeddem ara lbulitik nekni.Ala nexḍa yerna ur neččiḥ-ara! Awin i lḥun deg yid a win ilḥun deg uzal…xas tettban teqreb, ur ttamen, inni mazal!
Aït Slimane Hamid