Amek akken ḥsan merra yimdanen, ibki n teẓgi d yiwen n uɣersiw i yettakken aṭas n ucabeh i umdan, seg ɣersiw-a nuḥen ugar n 260 d asenf, kra seg-sen ṭṭfen-d seg tallit taqburt, kra nniḍen iban-d d amaynut deg umaḍal-a ameqqran…
Isenfan-a n yibkan yal wa anda ed wamek yettidir ; llan deg qeddac n yidigan daɣen, rnu aɣersiw-a yemgerrad ɣef gma-s s waṭas n tɣawsiwin, ama d tafekka neɣ d ayen nniḍen. Seg yibkiyen-a yella Ucampanzi ihi, win umi nezmer ad as-nsemmi gma-s n umdan s netta s wayetma-s. Wanag, Acampanzi yettakk anzi i ɣur-s s waṭas, yettakk-as ssmamat ugar n yisenfan nniḍen acku anagar netta i ikesben teɣzef n lqedd, imi tettaweḍ teɣzef-is alma d 150 n yisantimen. Nnig waya, acampanzi i yettidiren daxel 21 n tmura n Tefriqt, d amegzu yessexdam allaɣ-is send ad iger deg kra. Amgerrad yellan gar yibki-nni ed umdan drus kan, ɣas ma netta tudert-is deg lexla, lameɛna yettusemma cwiṭ d aɛeggal n twacult-nsen, imi s yisallen i d-kecfen yimnadiyen, netta ila tutlayt swayes yettemsefham akked wakniwen-is, imesli i d-yessufuɣ seg tɣect-is d anamek n wawal ɣur-s, rnan nnan-d dakken lemmer ad d-yefk tagnit i umdan ad yettqessir yid-s dima, yezmer ad d-yenṭeq s umeslay, acu kan tuggdi-ines tesbaɛɛid annect-a. Acampanzi daɣen d win itetten mačči ḥala yiwet n tgella, ulama yettkeṭṭir igumma n tsemhuyin i yettilin deg tẓegwa maca itett imɣan ed yizeǧǧigen i d-iqellaɛ seg ṭṭjur, rnu daɣen kra n yibeɛcan i d-yettesṭaḍ seg ṭṭjur, kifkif s tallelt n ukeccuḍ, skud yettaf tifrat swayes yesmurrus deg ccɣel-is s dduzan. Ula d aẓru yettruẓu yes-s ayen yeqquren, tikwal itett ula d ifrax ed yibkan imecṭaḥ daɣen, ma terra-t tmara. Ma d ayen yeɛnan asefti n uɣersiw-a, kra n twetmin-ines ttɣimant ɛlaḥsab imussnawen tawala n ṭam n wayyuren bac ad d-urwent agrud-nsent, meḥsub qrib tesɛedday-d tawala n tmeṭṭut. Ayen yesḥissifen ɣef uɣersiw-a n ucampanzi, dakken aql-it deg umihi (danger) n tnegrawt, imi simmal yettenqas seg umaḍal ɣef ssebba n twakksa n leɣwabi i yellan d azgen n tudert-nsen, ɣef tmentilt n tmenɣit-nsen seg tama n yiɣersiwen-nniḍen, amedya azrem ed wiyaḍ. Ma d ayen i d-yettakken lɣiḍ ameqqran d amdan i yettekkan deg uggaz n nnger-ines imi yeṭṭesṭaḍ-it-id ula d netta, yettu belli skud d rruḥ i yella, yezdi yid-s izerfan, laḍɣa imi lemmer ad t-ǧǧen ad yidir, ad yesmed semmus n tmerwin n yiseggasen iwakken ahat ad yemmet.
Mhenni Xalifi