Tikwal anda akken i yebda wawal, i-ifukk wawal, acku lehdu timsusen. Tuɣalen d war anamek. Akka dɣa d kra ur nettseḍḥi yebɣan ad rran tamettant n Mass Hocine Ait Ahmed d-adasil i dɣel-nsen. Ṭṭfen addud i lɛar ɣilen yis ad simsen i wid i ten-ifen ɣer taggara d udem-nsen umi ḍlan yir iseɣwan. Imdanen-agi( ǧǧent tissas) d wid id yeggaren yir axenffuc ɣer lkanun. Uma sriɣ i lehdur-nsen, uma sriɣ i tilin-nsen, imi yif-iten fiḥel. D wa – d amazan amezwaru n Mass Hocine Ait Ahmed i wid yettesmaden tiremt zdat nnɛi ! Tikwal anda akken i-ifukk wawal, id ibeddu wawal, imi tasusmi tesseɣleb lmenṭaq ɣer wid yettmeyizen. Asfuǧǧeɣ wergîn yebna tisadarin n ṣṣwab, aceqlal n wewtul werǧin yeserwel izem bu tissas. Ɣef aya wid yesnen azal n teqbaylit , ssnan amek i t-tteddu teqbaylit: s sser d lmeɛna d war lehmeq. Ferhat Mhenni yella seg wid yettqadaren taqbaylit, werǧin icmet-itt neɣ irekked-itt. D wagi i d –amazan wis sin n Mass Hocine Ait Ahmed i widen ifetlen yir lehḍur di tbaqit n tismin akken ad yeslal cḥani gar wid id turew yiwet n tɛebbuṭ: taɛebbuṭ n teqbaylit!
At Ahmed walan, ẓran fehmen anzi id yeqqaren: imawlan ṣṣebṛen imeɛaẓen kefren. Tamurt n Leqbayel twala , teẓra anwi i-yettcuddun imraren n lkerrh gar tarwa-s, d anwi id yesfillitrn i tagmat akked tadukli.Ɣef aya tenna uma sriɣ deg useweɣwaɣ n yir tagarfa, uma sriɣ i yiḥizi ur negzi timsal. Di tajmaɛt win ur nessin amek ara yesburr abeṛnus, ulayɣeṛ lḥir neɣ lwehma ma deg ijufar-is i tenta tagust . Melmi akka yečča yizem lǧifa, melmi akka yemmeɣ lbaz ɣef yir lefrisa? D wagi i d-amazan wis tlata n Mass Hocine Ait Ahmed : ala win wezzilen i-iteddun ɣef tifednin wamma win ɣezzifen ur terri tmara.
Di talalit talɣaɣt- éternelle- n Mass Hocine Ait Ahmed, adrar yezdi s lqedd, ma d wid yennumen syaḍa deg umurej, iban kan ɣer lhem-is i yeḥrured !
Ait Slimane Hamid