Tagara n ddurt useggas yezrin, ass n 28 dujambar 2015, amyaru asdawan s snat n tutlayin (Taεrabt d Tefransist), amusnaw Amin Zawi yella d inebgi n tiddukla tadelsant Tiεwinin n Wizgan, id-iheggan yiwet n temlilit n tsekla s usentel « Tasekla d talsiwin yemgaraden di Lzzayer », s uzenzu s ibudan n yedlisen-is deg wexxam n yedles Ferrat Remḍan n tγiwant n Wizgan, anda iḥedren deqs n yemdanen i ḥemlen tasekla xarṣum inelmaden n tsedawiyin yemgaraden am tubiret d Tizi-Wezzu. Amin Zawi yussa-d akked umdakkel-is Yussef Merraḥi, yiwen umusnaw u d amyaru i yetwasnen aṭas deg aḥric n tseklaqbel ad-yebdu umsarag timlilit-is, yerra tajmilt i ugrewliw Ḥussin At-Ḥmed i tewwi tmettant ddurt-agi yezrin, akked umdakkel-is Cerif Mesεuden, anemhal n wexxam n yedles Ferrat Remḍan n tγiwant n Wizgan i tewwi tmettant deg seggas n 2010. Syen Amin Zawi akked Yussef Merraḥi sḥasfen aṭas γef yemḍebren εlayen n lwilaya n Tizi-Wezzu d temnaḍt n Wizgan i iqarεen asarag n Racid At-Σli Uqasi id-hegga niqal tiddukla-agi Tiεwinin ass n 19 dujambar n useggas yezrin 2015, seba n usentel n usarag « . Γef temsalt-agi, amin Zawi yenna d akken adabu n Lzzayer n useggas n 1962 i yellan ar as-a, imi bγan ad-qnen tikmamin i yemdanen, bγan ad-qarεen imusnawen id-yettaken tidett d lbaḍnat yefren i yemdanen, maca γas akken llan wugguren-agi, amennuγ d win ara-ikemlen. Dγa seg seggas n 1962, tasekla tazzayrit tuḍen, muḥal tggar asurif meqren γer szdat am tsekliwin n lbarani, acku xelqen-d miḥyaf ger tutlayin, bγan ad-snarnin di taεrabt, ma d tamaziγt tettwarkeḍ s lebγi-nsen, maca γas tettwarkeḍ muḥal temmut, iẓuran-is mden, gman, reṣṣan di tmurt deg acḥal leqrun-aya. Syen yenna Amin Zawi » usmaγ aṭas imi ur sinaγ-ara tamaziγt » imi imawlan-is d lejdud-is d imaziγen d icelḥiyen n tlemsan. Syen yuγal yenna d akken tutlayt n taεrabt tezmar ad-tengar sya d afella imi ur tesεi-ara lsas iṣeḥan. Dγa yefka-d yien n ttbut di temlilit n tγamsa n yiwet n tilizri, anda is-d-yenna yiwen n unaγmas d akken tutlayt n taεrabt tettwaḥqar di tmurt n Lzzayer. Syen amyaru Amin Zawi yerra-as » D tutlayt n tmaziγt i ittewḥeqren si 62 ar ass-a, mači d taεrabt, adabu yefka akk ttawilat i yiwet n tutlayt tayeḍ iḥarmitt, ayen miḥyaf-agi ? ». Amsarag yemeslay-d γef deqs n tγarmiwin yemgaraden, d umecwar id-yewwi di tsekla d wugguren id-yettaf s zdat-s, acu kan yenna d akken aḍar iteddun yeṣawaḍ, ur d-yewwi ara aneggen deg uḍref, naγ anebru i tilla.
Islam Bessaci