Aṭas n leswaq i yellan deg Bgayet, deg qeddac n idigan, kra seg-sen acḥal-aya nutni xeddmen znuzun, kra nniḍen nnulfan-d taggara-ya d imaynuten. Am rreḥba n tnezzut tameqqrant i d-yellan ussan iɛeddan deg Lberj n Mira, taɣiwant n Tsexriwt, deg teɣzi n qrib ayyur. D timeyyatin n tɣawsiwin, tal yiwet deg usenf-is, i d-ijebden allen n medden i yerzan ɣer din s ṭṭaqa. Gar wayen akk i d-yettwafesren ɣef ṭṭwabel, neɣ i d-yettwaɛellqen deg yigenni, yezmer ad iwali unerzaf ɣer umḍiq-nni iselsa n tal tasuta (génération), tagella, isafaren n tmeṭṭut, dduzan n uxxam, akked wurar i d-isaḥen d amur tikkelt-a i warrac imecṭaḥ ma bɣan ad kksen ɣef wulawen-nsen ladɣa deg teswiɛt-a iɛeddan n yimuras (vacances)…atg. Ɣef waya, ddeqs n yibabaten i yessawḍen arraw-nsen ɣer umḍiq-nni n usgunfu anda yal aqrur ilaq ad ixelles kra n ssuma, teɣlay ɣur kra, iwakken ad yurar urar-a neɣ d wa. «Asmi sliɣ i ttawil n wurar i yellan deg ulzuz n Lburj n Mira, wwiɣ-n mmi ad yurar din kra war ma yessuter-iyi-d, maca mi newweḍ din ur yufa ara uraren i as-yehwan, am win n tkeryas, dɣa nuɣal-d dindin». I aɣ-d-yenna yiwen n ubabat. Seg tama n tlawin, aṭas i yerzan ama seg Ayt Smaɛel, Ssuq n Letnin, Ayt Idris, Kefrida, ed temnaḍin nniḍen i ibeɛden cwiṭ, merra deg-sent s usirem ad n-afent ayen ara asent-yeččaren tiṭ deg rreḥba-ya n tnezzut i yemuggen i tikkelt tamenzut deg Lberj n Mira. «Lliɣ serseɣ kra n tedrimt swayes ɣileɣ ad d-slezmeɣ iman-iw seg ssuq-a. Lameɛna ufiɣ kennfent d axessar ssumat n tɣawsiwin». D wa i d rray n yiwet n tlemẓit mi tt-nesteqsa.
Mhenni Xalifi