Timkarḍit n wedlis n tutlayt n taqbaylit d tin yettnarnin deg ass γer wayeḍ, s yisental imaynuten. Dγa neḥṣa zikk-nni timetti taqbaylit d tin i yettwasnen aṭas s yidles-is d umezruy-is, tettwassen diγen s tsekla-s. Ma yella tasekla tamensayt taqbaylit d tin i yellan d timawit kan, yerna tiwsatin-is d tid i yerzan anagar tamedyezt, timucuha, inzan d temseεraq; maca ass-a, tlul-d yiwet n tsekka-nniḍen n tsekla, ta d tin i wumi neqqar tasekla yuran, tasekla-ya tamaynut tegla-d s tlalit n tewsatin-nniḍen : ungal d tullist (le roman et la nouvelle); d tiwsatin i yellan akk deg tsekliwin n umaḍal. Tikkelt-a d amyaru Muḥend ARKAT i yeswen tibḥirt n tsekla n teqbaylit, imi yegla-d s umaynut, ungal iwmi yeqqar Tiwizi akken tagmat ad tili. Asentel-agi icarwit-id deg ayen icuden γer wnsayen n lejdud, imi tiwizi tettak taswiεt naγ tagnit i yimezdaγ n tudrin n leqbayel akken ad-beggnen tagmat i ten-icudden i asen-yettaken afud d lğehd i tegmat tbeggen-d am yal tikkelt leḥmala yellan gar yimezdaγ yettidiren deg yiwet n tadert am yiwet n twacult. Annect-a ibeggen-it-id umyaru deg ungal-is tiwizi, anda iεeggalen n twaculin n taddert ger-asen Meẓyan meqran d tlawin-nsen Tasaεdit d Wezna, xedmen tiwizi n lqeḍ n uzemmur, dγa amyaru Muḥend ARKAT yerẓa leqyud n kra laεwayed, imi yesenṭṭeq-d tayri i xedment tlawin d yargazen-nsent, yefka azal i leḥmala yellan ger Mmi-s n Yidir d yelli-s n Ḥend. Ulac win iḥeqren wayeḍ, imdanen d wulawen duklen, ulac win ara ṭṭfen yifassen n uεdaw, taddert teddukel, ulac win izemren att-yebḍu. Dγa taddert yedduklen tesεa tazmert n wamman, tetnarni ger yiḍ d wass, yettali wazal-is, texḍa i ubrid n ngger. Tiwizi tesdukul imdanen, tesawal i tegmat, ayen id-yaγlin fell-asen zemren-as. Ma yella imezdaγn taddert zedigen, tudert-nsen ad-tizdig.Muḥend ARKAT d yiwen umyaru yettaẓen aṭas γer zdat, yettidir di tmurt n Leqbayel. D aselmad n tutlayt n Tefransist, maca amennuγ-is yezga γef tutlayt n teqbaylit. Yura yakkan ssin ungalen « Abrid n Tala akked Tameγra di Taddert ». Ma yella d anegaru-agi d ungal Tiwizi tutlayt i yesaxdem ad tt-naf d tushilt, d tusridt, teshel akk ɣef yimdanen. Amawal n yinnan-is d ushil, yefruri-d seg tutlayt tamaziɣt tanaṣlit, tin i ttmeslayen yibabaten akked lejdud-nneɣ seg zzman aqdim, acku amaru d win yettextirin awalen-is, anda ad ten-naf fessus-it maca ččuren d lemɛani. yesazreg-it-id di tezrigin n La Pensée, yesεa 90 isebtar, yettnuzu s 250 idinaren.
Islam Bessaci