Segmi i d-yeḍra umsegraw-nni (anejmuɛ) n la COP 21 deg Pari, tamaneɣt n Fransa, ɣef ubeddel i d-yettilin iseggasen-a ineggura deg twennaḍt, uɣalen kra n medden ttmesteqsayen, kra ssaramen, wiyaḍ ugaden seg wayen izemren ad d-ibin seg umcawer-nni n yisertanen, ideg ttekkan, d asmekti kan, azal n 195 n yiselwayen n tmura. Ɣef waya, aselway n Tesbeddit Nikulas Hulu i Ugama ed Umdan, yella, deg teɣzi n wayyuren, yeṭṭafar amaynut n wayen s tezmer ad d-teglu temlilit-a tagreɣlant mi yella yeḥḍer-as s timmad-is, rnu yezga yesseɛlam deg yimdanen akk i iqerben i tesbeddit. Tura ihi, segmi temmug tɛedda dayen, yefka-d tasleḍt-is (analyse) ɣef wamek yettwali ed unamek n wayen i d-yellan. Ɣef tmuɣli-s, ahat akken yebɣu yili, tezmer talsa ad tessirem i yigmaḍ igerrzen imi i tikkelt tamezwarut i mtawan yisertanen ɣef twennaḍt, maca, seg tama nniḍen, ur ilaq ad ɣeflen yimdanen amzun tefra, ; wanag yewwi-d ad kemmlen aḥras-nsen ɣef yimḍebbren alama yeqqel wawal d tigawt. Skud ar tura, ɣas myefkan merra lɛehd i lɛali ed tezdeg n ugama, maca acemma ur yettwassemres deg tidet ɣef wannar. Yuɣ lḥal, akken ɛeqlen umeqqran ed umeẓyan, liḥala n twennaḍt tenṭer almi dayen kan almi neḥḍer i lexsas n waman ula deg ccetwa. Rnu, ssmamat n waṭṭan n twennaḍt acḥal-aya segmi i d-banen deg umaḍal-a ɣas ma mačči i medden merra.
Mhenni Xalifi