Akka, kul ma tiweḍ-d tallit n welqaḍ n-uzemmur tettuɣal-d yiwet akkeni n temsalt ger yimdanen. Tagi d tin yaɛnan lemɛinṣrat, neɣ tissiyar n-uzemmur. Akken neẓra, llant snat n lemɛinṣrat: Tiqburin lakked titrarin. Medden bḍan ɣef sin ɣef ayen yaɛnan tamsalt-agi. Llan widak i d-yeqqaren belli tissiyar tiqburin axir n tmaynutin. Wiyaḍ qqaren-d mgal aya. Garasen, azemmur « yaḥṣel » ger iɣuraf. « Ur yeẓri » anta lemɛinṣra is ilaqen ? Tin nzik? S teqfacin-is, s yiɣuraf-is n wedɣaɣ, s lḥuḍ-is, s lquqna-ines, s userdun-is…? Neɣ d tin n tura yeččuren d timacinin titrarin yettɛewiqen amdan? Tirririt i waya tuɛer, acku lemɛinṣrat-agi di snat yidsen-t sɛant udem yelhan d wudem n diri. Maca, iniɣ s-umeslay yewwi kra n yimɣaren deg tama-agi n’At Ṛẓin i d-yezgan deg wenẓul n twilayt n Bgayet. Ass-nni n aram yezrin, ǧmaɛ liman as t-iniḍ ar d-amgaru yekren ger kra akkeni n yimɣaren deg yiwet n lqahwa. Llan kra qqaren-d i wiyaḍ belli lemɛinṣrat tiqburin « axir », acku, ɛla ḥsab nsen, « ssufuɣent-d zzit azedgan. Ɣas akkeni ur yeṣfi ara, maca ẓẓay yesɛa amureǧ d dwa i bnadem! ». Ayagi mači d rray n wiyaḍ i d-yenan belli zzit n tissyar timaynutin « axir, acku zzit i tefɣ-d yeṣfa, d-awraɣ. ». « Nek ɣer ɣuri zzit ur nesɛi ara amureǧ, mači d zzit! » i yerfa yiwen akkeni n wemɣar. Lḥaṣun, qqimen imɣaren-agi « ttemwaten » s yimeslayen. Ulac wid i ɣelben wiyaḍ. Ma deg tidet, ma wezzil wawal; tissiyar-agi n uzemmur tiqburin d ṣṣaḥ ur teẓment ara akken ilaq azemmur, ɣef ayagi zzit ur d iteffeɣ ara akkit. Yerna azemmur yettwaẓḍen deg lemɛinṣrat-agi i tefɣed ẓẓay, yuɣ lḥal yeččur d-amureǧ. Wagi, d tidet yelha i tezmart n wemdan, ɣef ayagi llan wid i ḥemlen zzit n tissiyar n zik. Yella yiwen wudem ameggaz: zzit-agi n lemɛinṣrat tiqdimin ur ireq ara, ɣef ayagi zzit-is yetɣimi akkeni s lbenna-s, yerna tɣimin degs « Les vitamines », ur reqqen ara. Ma yella d tissyar timaynutin, tigi d tidet t ṣeffint zzit akken ilaq, i tefɣed yeṣfa, ur isseɛu ara amureǧ. Yerna teẓment mliḥ azemmur akken ad ifek akk zzit-nni yesɛa.Dacu kan, timacinin titrarin sruɣuy-ent zzit-agi, ɣef ayagi tettruḥuy-as lbenna, yerna « Les vitamines » reqqen neɣ neqsen aṭaṣ. Syphax Y.
