Tadamsa n tmurt n leqbayel tcud aṭas γer lγella n uzemmur, γef aya Tiddukla Tadelsant Tawwurt n At γebri n taddart tawwurt, s lemεawna n tesqamut n taddart-agi d tγiwant n Yifiγa, ad d-sudsen tazrigt tis 03 n tmeγra n uzemmur ara yebdun ass n 26 almi d 27 furar deg aggur ideg nella γef teγzi n 02 n wussan. Tamesbanit-agi tadelsant ad tt-id-yesdari uγarbaz amezwaru n taddart n tawwurt, anda ara ttekkin azal n 20 n yemzikniyenara ara d-yasen si temnaḍin yemgaraden n lwilaya n Tizi-Wezzu d lwilayat niḍen am Tubiret d Bgayet. Ahil id-heggan γef demma n waya d amerkanti yerna d amesbaγur, timzikniyin n zzit uzemmur s leṣnaf-is yemgaraden, timliliyin d isaragen anda ara ad-meslayen imusnawen deg uḥric n tfellaḥt γef azal yesεa uzemmur di temnaḍt leqbayel d wamek ara d-yilli uḥareb fell-as akken ad-teqqim d lγella n lebda, d temzikniyin niḍen n lḥirfat ufus, am talaxt, aẓeṭṭa, d wayen icuden γer useḥbiber γef twenaḍt. Tameddit n wass n 27 furar, d tagara n tezrigt tis 03 n tfaska uzemmur ara yekfun s yiwet n tmeγra meqren. Iswi n tfaska-agi d tikci n tebγest d wafud i wuẓẓu n uzemmur akken ad-yenarni yedles n teqbaylit, d tikci n wazal i tgemi. Akken tella d tagnit yelhan i yemdanen akken ad-sεun tamuγli yelhan γef lγella n uzemmur d uḥareb fell-as. Leqdic d win iεeddan di tegnatin yelhan nezzah.
Islam Bessaci