Xemsa uxemsin n yiseggasen zrin ɣef wasmi akken yetterḍeq uɛbar deg wudem n umehras afransis. Kkren wid ɣeẓẓan wanzaren-nsen s yifassen d ilmawen d wulawen yeččuren d tabɣest. Γlin, kkren, lluẓen, nḥafen, maca wicqa, ɣer yiwen n wass ad tifrir tagut, ad d-sɣersen tilelli. Am wakken i tt-nnan i teffeɣ,; ayen meyzen wwḍen-t. I taggara-nni, am i teffeɣ targit n widen tezdeɣ nniyya ? Amirouche yessenhezzen tasa n De Gaulle iruḥ ur iwala ara d akken di 1963, tamurt n Leqbayel ɛummen-tt-id lɛesker n Lezzayer, nɣan acḥal d amsedrar ! Urɛad sfiḍen yimeṭṭawen n tegrawla mmaren-d wiyaḍ,; imenɣi yuɣal-d ɣer daxel. Ttafgen lerwaḥ amzun d iferrawen i iteddem waḍu. Abane, “l’architecte de la Révolution” akken i s-qqaren, yerra tilisa akk i temsal mi ara tefru tegrawla, ur iwala amek at Icumar ɣedlen-d rrehba di tmurt, ssawḍen armi tsubb s anda ur d-tettali. Di leḥkem, atan tturaren fell-aneɣ lkarṭa, win i yetturaren i ireccmen. Aɣerbaz azzayri wwint-as-d akal, yak letniyen iruḥ d tlata ɣer larebɛa i d-mlalen, akken i s-yenna umedyaz. Tadamsa yekcem-itt ssus, ttakren armi i ttwafeḍḥen deg uzal. Yerna d imḍebbren imeqqran ya ɛajaba ! Aqbayli amagday tettɛeddi fell-as tcalwawt, yuɣal yettmuqul am ugugam, daɣ ur yeẓri anita tama ara iɛas. Seg yiwet d wid izellun, si tayeḍ d wid yettakren.
“A tafat n tifrat, mmel-aɣ abrid ar zdat”.
M. Smail