Akka i ḍerrunt, akka i ferrunt. Melmi kan i tt-tendiḍ, rǧu nnuba-k segmi ara d-jbun widak ara k-tt-yendin. Segmi akka i d-ttlalan yikubar n tsertit, wid yellan yakan deg unnar ikcem-iten ssus almi at ufella ur qbilen at wadda, at umalu beggsen-d ɣer at usammar. Amek ihi, rɛud n RND yeglan s umaray amatu ines, yerna mačči d menwala ! ur yezmir ara ad d-yeslal tixazabiyin nniḍen ara yessemxurgagen ikabaren ladɣa win akken ireṣṣan seg umenzu n unbir 1954 ? kullec yezmer ad d-yeḍru, awal awezɣi yenfa seg unnar n tsertit.
Deg wussan yezrin neɣ ahat deg wagguren, yuzzel wawal ɣef usebɛed n Belkhadem seg yixf n ukabar FLN. Tarbaɛt n Khaldi d Kara teggul ur tebri i ṭṭbel deg waman alamma tegla s Si Abdelaziz. Meɛna seg wasmi i bdan imenɣi almi d ass-a, iḍul uqnaq, ayen i d-yesbegnen lǧehd n Belkhadem. Uqbel dɣa tifranin n tejmaɛt taɣelnawt, ixṣimen-is ggullen dakken ar d tagnit ideg ara d-iban leqdic n umdan-a i ttwalin yeffeɣ i ubrid n ukabar. Meɛna, igemmaḍ i d-iḥella FLN rnan deg teɣzi n leɛmer n umaray amatu i yenwan ibeggen-d s tidet leqdic-is deg unnar n tsertit. Taluft ur tefri ara da ! Yeɣli yizi s iɣi, akken i qqaren yimezwura. Ama d ineɣlafen n ukabar-a neɣ d imazanen-is di tejmaɛt taɣelnawt, iwulem fell-asen ad d-begnen tiddi-nsen. Tekfa tsusmi, wwḍen s awal n ccix Muḥend: Imezwura iban-asen, ineggura iban-asen, aḥlil ay ilemmasen ! D ayen i yeǧǧan tmanya-nni n yineɣlafen fɣen-d s yiwen n wulɣu anda i tt-gezmen di rray belli Belkhadem ur yelli d imḍebber fell-asen. I mazanen, si tama-nsen, suɣen ɣef win yettmeslayen ɣef yisem-nsen daxel n tejmaɛt imi yedda d Belkhadem s yisem-nsen. Imir, tefḍeḥ ddiminu, idubliyen banen-d anda llan. Ḥala asqamu n ukabar ara tt-yefrun ! Din dɣa, ɣef leḥsab n yiɣmisen i d-yessawḍen isalli, Si Abdelaziz yessuget-d iwiziwen, neɣ ahat d imenḥal, ara yesneqlaben taswiɛt. Netta s timmad-is, yenna belli d awezɣi ad jebdeɣ iman-iw, ma yella-d dɣa s tidet waya, d iɛeggalen n usqamu ara iyi-yestixren.
Ass n lexmis iɛeddan, widen akken i yeggulen, ssawḍen, imi rran ẓẓerb i leḥkem n Belkhadem ɣef uqerru n FLN. D yiwet n temsirt ara d-ibegnen belli akersi ur yettdum ara i yebɣu irhen-it bab-is. Maca, Lwennas, ad tt-yessewseɛ fell-as Uxellaq, yenna: Win iɛerḍen tacriḥt n tsekkurt, ur iqenneɛ ara. D ayen i yeǧǧan imḍebber- a yefɣen seg tebburt, yebɣa ad d-yuɣal seg ṭṭaq, imi, yezmer lḥal, ad yili seg wid ara d-iqeddmen iman-nsenɣer tefranin ara yexdem ukabar-a ɣer tselwit n ukabar. I neẓra, mazal ad nẓer !
S. M