Qarren yiwet n tikkelt uccen issaweḍ-it llaẓ γer yir tagnitt, ihi ay ileḥḥu ittenduda armi yufa yiwet n tneqlett tekna seg wakken teččuṛ d tibexsisin llan ula d iḥbuben.
Yuγal iffeγ-it laεqel, iqqim ay itett armi ibzeg uεebbuḍ-is, ikker ad iruḥ izzi γer tmeγrust-nni inna-yas:-Ad m-yefk Ṛebbi ṣaḥḥa s tidett degmi i m-qqaren nniya n tbukart ittarwen snat tikkal deg useggas, teččureḍ d lxiṛ.
Iεedda lweqt izzi llaẓ γef wuccen ageswaḥ ur yufi d acu ara iger γer yimi-s, am win ara t-id-ismektin, irra srid γer tneqlett-nni di ccetwa yaf-itt-in ala isγaṛen acku di tegrest tineqlin iγeli-yasen yifer gwrrint-d d tiεeryanin degmi iqaṛṛen: « Aṭṭas i izha di lexṛif di ccetwa idda εeryan. »
Uccen irfa seg ur d-yufi ara nnṣib, iḍme&epsilon,; izzi γer tneqlett-nni inna-yas: D ddγel-nni illan deg wul-im i kem-iğğan akken d taεeryant.
Yir tiselbi
Mi ara walin yimdanen yiwen ismuslub, qarren-as wihin ur islib ara, maca ittarra iman-is d ameslub i wakken ad irwel i lwağeb d-isennden γur-s, netta di tidett tella deg-s tiselbi a lukan cwiṭ, acku anwa ara irren iman-is d ameslub?
Ala win iselben.
Qarren yiwen wass sin d imejhal mtafaqen ad hudden aεessas, ihi ruḥen hudden taqubett, mi fuken ccγwel-nsen, inṭeq yiwen γer wayeḍ inna-yas:-Tura ad ak-iniγ yya a nekkes iserwula nneγ a ten-nerr γef yiqerra nneγ akken ad hedren medden belli iwwet-aγ-d uεessas.
Γur-sen d urar, xeddmen akken.
Γilen meḥsub d tiyta alamma s ufus neγ s uḍar, netta alḥal ttewten-d s ṛṛay-nsen.
Yahia Yanes