Zik-nni, di teẓgi n lewḥuc llan tlata n yiɛewdiwen acebḥan, aberkan d uzeggaɣ. Ttidiren akken d yizem d wuccen. Iɛewdiwen dduklen am yiḍuden n ufus, kessen akken ganen akken, yiwen ur ittak afus di gma-s. Izem, lmir n lewḥuc izga ittgabar-iten ad ten-yečč maca imi dduklen ur asen-izmir ara. Ma d uccen bu tḥila ittɣimi-d kan mbaɛid, ittɛasa-d ma ad d-teɣli kra n cuffa akken ad d-isekcem iman-is. Tewweḍ-d tegrest izem d wuccen ufan-d iman-nsen taɛebbuḍt texwa, ulac d acu ara ččen. Si tnezzayt alammi d ɣelluy n yiṭij d amenḍar di teẓgi ttnadin kra ad t-ččen. Ma d tlata-nni n yiɛewdiwen, nutni, ṛebban tacriḥt, akk wass d takessawt. Leḥcic azegzaw yal ṣṣenf igget di teẓgi, aniwer terriḍ ad d-tcerfeḍ. Assen, uccen istaɛfa nnig ubrid, iɛedda-d yizem ddaw-as, ileḥḥu-d am win yuḍnen, iluɛa-t inna-as : -Ssbaḥ lxir ay agellid n teẓgi, d acu i k-yuɣen akka? Tettbiniḍ-iyi-d am win iḥeznen neɣ yuḍnen ! Ibedd yizem, ixzer d asawen seg wanda d-yeffeɣ ṣṣut, iḍher-as-d wuccen, irra-d nnehta inna-as : Amek ara tiliḍ bxir ay uccen i nekk iddren aɛebbuḍ xawi !Yenna-as wuccen : A-ten-in tlata n yiɛewdiwen llah ibarek ḥlan d ayen kan, ad teččeḍ ad tsigreḍ. Yenna-as yizem : Ẓriɣ-ten ay uccen! Acḥal aya i ten-ttgabareɣ maca ur asen-zmireɣ ara di tlata, dduklen am yiḍuden ufus. Uccen : D ayen isehlen a lmir n lewḥuc, ad ak-mleɣ amek ara asen-txedmeḍ akken ad ten-teččeḍ di tlata ! Izem : Dɣa ma temliḍ-iyi amek ara ten ččeɣ ulac ameddakel am kečč. Uccen : Ihi, ay izem mi twalaḍ yiwen seg-sen iḍaref i watmaten-is, aẓ ɣer sin-nni, cekker deg-sen, inni-asen ulac am kunwi di sin, acukan icemmet-iken winn-a nniḍen, ma tebɣam ad awen-t-kkseɣ. S wakka ay izem sin-nni n yizgaren ad semḥen di gma-tsen. Ssyin, mi teččiḍ amezwaru tzemreḍ ad tuɣaleḍ ad d-tesxedmeḍ yiwen seg sin-nni i d-igran, akka alamma teččiḍ-ten akk. Izem iḥeznen yuɣal ifṛaḥ, yenna-as i wuccen : Lxir-ik d ameqqran ay uccen, werǧin ad t-ttuɣ! Terriḍ-iyi-d asirem. Assen, izem iwala aɛewdiw acebḥan ikess weḥd-s, iḍarref cwiṭ i watmaten-is. Iqreb ɣer sin-nni, inna-asen : tgerrzem mi ara tkessem akken di sin yid-wen mebla acebḥan-inna, ulac win ara ken-id-iwalin mbaɛid akken ad d-iruḥ ad ken-yečč. Acebḥan-inna ittbin-id si lebɛid izmer ad awen-d-yawi cum ! Ma tebɣam ad thennim seg-s, ad tidirem di lehna, ad awen-t-kkseɣ ! Iɛewdiwen-nni mcawaren, qublen ṛṛay n yizem, semḥen di gma-tsen acebḥan. Izem iɛna aɛewdiw-nni acebḥan, immeɣ-as ɣer umgarḍ, ixneq-it inɣa-t, ičča-t. Zrin kra n wussan, izem yuɣal ɣer yiɛewdiwen-nni. Iwala aberkan ijbed-d cwiṭ iman-is ɣef gma-s, iqreb ɣer uzeggaɣ ibda a t-ittcekkiṛ ittcuffu-as aqenduṛ, iqqar-as keččini tgerrzeḍ d ayen kan i k-icemmten d aberkan-inna icban ambux, ma ihwa-ak ad ak-t-kkseɣ si ddunit. Azeggaɣ iḥus i yiman-is meqqer, inna-as i yizem kkes-iyi-t akin. Izem iɛna aberkan. Am ucebḥan, immeɣ-as ɣer umgarḍ, isseɣli-t inɣa-t, ičča-t. Ɛeddan kra n wussan, izem iqqed-it laẓ, yuɣal ɣer userdun-nni azeggaɣ, immeɣ fell-as iluḥeq-it deg umeẓẓuɣ. Aɛewdiw yuɣal timendeffirt iṣedwi am waḍu ɣer yiɣzer ad iffer. Uccen mbaɛid, ayen akk iḍran akk ɣef tiṭ-is, iqreb-d, iluɛa-d izem inna-as : Amek ay izem tessawḍeḍ ad teččeḍ iɛewdiwen ? Izem : Ččiɣ sin, ma d azeggaɣ-nni kkseɣ-as-id kan tameẓẓuɣt, issenser irwel. Tura imi iḥa iwɛer-iyi ad t-id-ṭṭfeɣ ad t-ččeɣ. Uccen : Xas kkes aɣbel ad ak-t-id-awiɣ alamma d dagi, kečč ferr ssyin ẓdem-d fell-as mebla ma ibna. Izem : Lxir-ik d ameqqran ay uccen, werǧin ad t-ttuɣ! Uccen yuder anda illa uɛewdiw iqenneɛ-it ad d-iddu yid-s. Akken d-yewweḍ anda iffer yizem iḥbes. Izem iqers-d ɣef uɛewdiw azeggaɣ, immeɣ-as ɣer temgarḍt isseɣli-t inɣa-t. Ssyin, inna-as i wuccen ɛass-it-id wi i t-itetten, nekk ad steɛfuɣ cwiṭ usawen-ihin. Iqqim wuccen weḥd-s, immeɣ ikkes-d ul-nni n uɛewdiw, ičča-t. Ssyin yeɛna yiwen n uḥdid, iqqim, ittraju melmi ara d-yuɣal yizem. Mi d-yuɣal yizem iɛna aɛewdiw-nni, immeɣ ad as-id-ikkes ul-nni-ines yaf-it ulac-it. Iluɛa uccen yenna-as : Aɛni teččiḍ ul-nni-ines ay uccen ! Yerra-as-id wuccen : I k-ufiɣ d nniya ay izem, ɣef wayen akk i as-txedmeḍ i uɛewdiw lemmer i isɛi ul da ad d-yuɣal ɣur-k !
Ramdane LASHEB