Ussan-a iɛeddan i d-yewweḍ yisalli yessefraḥen dakken yeffeɣ s wayen yelhan ucerreg (opération) n uḥeddad n wawal, mass Zedek Mulud, i iga taggara-ya deg yiwen n usbiṭar deg tmurt n Fransa. Ma nemmeslay-d ɣef wugur-a n tezmert, ed tmentilt (sebba) i yeǧǧan bab n « Hatan ihi » ad yerr ɣer ttawil n ucerreg, ad d-nini mačči d ayen iweɛren, imi d kra n waṭṭan icudden ɣer tiqraḥ n yiẓi, d ayen yuggten dɣa taggara-ya ɣur waṭas n yimdanen, ladɣa wid yesdafflen akkin tlatin n yiseggasen. Ad d-nesmeki belli segmi i d-yekcem Zedek Mulud ɣer Tmurt deffir ttiɛadat n ccna i iga deg Tkanada ed Fransa, yella ad tekk fell-as tmeqset send ad yekfu useggas yezrin n 2015. Maca, ɣer taggara, yettwaẓuɣɣer usihar almi d tazwara n wayyur-a n furar deg nella. Tura segmi i iɛedda ucerreg deg tegnatin igerrzen, ad yili Zedek Mulud ussan-a deg uxxam-is anda ara yesgunfu kra n wakud. Ma d wid i t-iḥemmlen ed wid yessnen azal-is i tezlit tazwawt, ed tmaziɣt s umata, zgan fell-as d asteqsi ɣef wamek tella liḥala-s, d assirem akken ad yeḥlu s tazzla ad yuɣal ad yeddem adinan-is, ad yesbeɛẓeq taɣect-is. S tujit-ik a win yesqerdicen awal!
M.X