Kra n wassan kan segmi yettwahud sɣur wiss anwa, tessufeɣ-d tɣiwant n Bgayet yiwen n wulɣu ideg i d-tesneɣmes s tririt s amḍiq-is n usebdad-a s ubrunz (bronze), amhad (lexmis) iɛeddan, am wakken teṛgem. Terna, ɣer taggara n yizen-is, twekked-d dakken mačči d aselway n tɣiwant n Bgayet i yessawlen i uhuddu n uqbur-nni am wakken ssekren aberraḥ kra. Ɣas ma yella kra ttwalin belli ur yettcabi umezwaru ɣer win i d-yettzemmil. Dɣa, d taluft-a i mazal tḥeyyer aṭas n medden, tugart wid i yerza yidles. Imi, ma yella mačči d albeɛḍ n yimḍebbren i yessamren i uqeddic-nni, war ma sneɣmsen imezdaɣ, ttwalin ilaq ad yili unadi s telqey ɣef tedyant-nni akken ad iɛeddi deg teɣdemt win tt-igan. Iban, yuɣ lḥal, yal wa tamuɣli-s, yal wa d acu i yella iwala seg uhuddu n usebdad-nni amezwaru; ḥedd yeqqar tcudd i udrim, wayeḍ i ccbaḥa, neɣ daɣen i userkec, ɣas asteqsi yeqqim war tiririt.Ad d-nesmekti belli asenfar n ubnaw n usebdad-a n Saɛid Meqbel deg mayyu n 2013 ur d-yettili lemmer ur s tallelt n tdukkla n yineɣmasen i yennuɣen s yakk leǧwareḥ-nsen almi i d-yeḥḍer usbedd-ines.
Mhenni Xalifi