Ass-a i d ass aɣelnaw n yimeɛḍar. Ilmend-is, ddeqs n tdukkliwin tilsawiyin neɣ tinmettiyin, i d-iheggan ahilen s wazal-nsen, grawlen ɣer tecriḥt-a i yuḍnen n tmetti, ussan-a n usteɛfu n sem ed sed. Gar tdukkliwin-a ihi, tella Tdukkla Tinmettit i Yimeɛḍar ed Yimuḍan Idumen n tɣiwant « Tiɣri » n Ayt Smaɛel, akked Tdukkla taɣelnawt “Asirem Guraya“ n Bgayet. Ma nemmeslay-d ɣef tmezwarut i d-iheggan aqeddic d amerkanṭi deg uxxam n yilemẓiyen n Ayt Smaɛel, ideg d-yella usiwel n tmacahut i yigerdan sɣur unalas Fares Idir, tanezzut s ubuddu n wungal Asdawan ed uḍebsi Tifrat n Mhenni Xalifi, afraq n kra n dduzan i yimeɛḍar am tɛekkazin ed tceryulin, tagnit n yisefra, rnu ɣer waya, amsizwer n usuneɣ (dessin) ɣef usentel n umeɛḍur ed twennaḍt-is. ɣer tmeddit, yella-d usarag sɣur uselway n tdukkla Tiɣri, mass Smaɛil Ɛebdun, ɣef wayen ilaqen i umeɛḍur, ed wayen mu itessra. Send ad ttunefken warrazen i yiqcicen i d-yewwin tizmilin n lɛali. Ma yella d Asirem Guraya, deg uqerruy-is mass Ɛmer Rabḥi, ɣas deg yiḥricen nniḍen i tqeddec ugar, wanag tezzi-d ssebt-a yezrin ɣer umeɛḍur, mi tga tiwizi akked tdukkla Awrir n Usalu n At Ǧlil, akken ad smersen ahil-nsen. Gar wayen i gant, tella-d tirzi lwaḥi ed yimeɛḍar ɣer kra n yimeḍqan, asenɛet n temzikknin, amsizwer n usuneɣ i warrac n taddart-nni, tuẓut n yisekla akked yimeɛḍar, yiwet n tsaragt s uzwel n « Tigzi n tiɛudert i yibeddi yelhan ». Rnu ɣer-s, tikci n warrazen ɣer taggara i warrac imeɛḍar.
Mhenni Xalifi