Deg tɣiwant n At Ṛzin, i d-yezgan deg wenẓul n twilayt n Bgayet, yella dinna yiwen weɣbel d-amuqran. Wagi icud ɣer rṣaḍ. Akka, taɣiwant-agi ur tesɛi ara, ar ass-a, amḍiq i uḍegger n rṣaḍ. Ayagi, yeǧǧa wigi « ttufen » d ttirac deg berra, deg zenqan yagi n taddart n Ginduz, yellan akka d-aqerruy n tɣiwant. Yir rwayeḥ, iḍan d yimcac tetten deg ilefḍan nni, lfuḥa,…mači d yiwwet ar ad nebder! Imḍebren n tɣiwant ḥeṣlen amek ar ad xedmen? Akal ar ay ǧemɛn iḍuman ulac. Ṛran-t tewwura! Weqbel yir liḥala-agi, llan rṣaḍ n tɣiwant-agi n At Ṛẓin ttuḍegren ɣer yiwen wemkan iwumi ssawalen: Icuqar, i d-yezgan ɣef rrif n wassif Aɛebbas (ssawalen-as daɣen assif n Saḥel). D-acu, imezdaɣ yellan din, yaɛni i qarben i ugudi-agi, ṣebren acḥal d-aseggas i dduxan lakked d timas i ceɛlen ixeddamen n tezdeg n tɣiwant-agi. Alarmi d yiwen wass (kra n sin iseggasen aya) rfan, dayen « tewḍiten-id ɣer yiɣes », kren, ihi, squqren ixeddamen n tezdeg asmi id d-usan ad ḍegren rṣaḍ. Akka gezmen abrid yettawin ɣer ugudi n yicuqar. Seg wass-nni, imḍebren n tɣiwant ččan iqerray-nsen. Iḍumman ččuren deg berdan, yir rwayeḥ, iḍan xeguḍen s yiḍaren nsen,..lḥaṣun mači dayen ar ad neḥku! Akka, i teqqim lḥala kra n sin wagguren (deg useggas n 2014), maca yekker yiwen n mas, deg taddart-agi n Ginduz, yefka i tɣiwant, deg laɛḍil kan, akal akka i uḍeger n rṣaḍ. D-acu, ɛeddan iseggasen, amkan-nni yuɣal yeččur, ulamek ad rnun rṣaḍ nniḍen ! Akka, teqqim tɣiwant deg tezɣent-agi n rṣaḍ, ar ass-a ur as tufi tifrat. Ihi, rṣaḍ deg uqerru n tɣiwant n At Ṛẓin tzaden, rennun, seg wass ɣer wayeḍ. Ayagi ur yessefraḥ ara, imi iḍuman-agi neẓra d-acu i d ttawin d-aṭanen yuɛren. Yagi, imi id d-gren iman-nsen yiḍan lakked yimcac akken ad sferfuden s tinzar nsen deg rṣaḍ-agi « yesṭaɛṭiɛen » deg yal amkan. Imezdaɣ rfan dayen kan, ɣas akken mazal ur d sbegnen ara lɣiḍ nsen mgal « udem » n yimḍebren. Tagnawt deg taddart-agi t ttriḥi, ur yezmir ara wemdan ad iɛeddi zdat n igudiyen-agi…
Syphax