Segmi yettwabṭel ilindi umsizwer Lwennas n Ayt Lewnis (Meɛtub) n tmedyezt, i d-yesmektayen anaẓur ed umdan amḥaddi, tuɣal-d aseggas-a Tesbeddit (fondation) Lwennas Meɛtub, deg uqerruy-is Malika, s tiɣri nniḍen i tikkin i umsizwer d amaynut deg teẓrigt-is tamenzut; wa d amsizwer n ccna i yettwasemman « Anza n Lwennas ». Kra n win i yebɣan ihi ad yekki, atan tɛerreḍ-it tesbeddit i d-nebder, ad iger asurif ɣer uxxam-is deg Tewrirt Musa akken ad ijerred iman-as, aya seg 24 deg yennayer ɣer 15 deg yunyu n useggas-a n 2016. Neɣ ad yessiwel ɣer: 020 61 59 29, neɣ 0552 79 09 80. «Nwala dakken aṭas n yilemẓiyen i d-yettnekkaren ṭṭafaren abrid n ccna i d-yewwi Lwennas. D aya i aɣ-yeǧǧan ad d-neg amsizwer-a n ccna…». Wa d kra seg wayen i d-tenna uletma-s n uɣewwaɣ, Malika Meɛtub, deg uẓeṭṭa inmetti. Ad d-nesmekti belli yella yetturaǧu kra ad yili almi dayen kan, ladɣa seg tama n yimedyazen, imi ilindi ur yemmug umsizwer-nni n tmedyezt i nnumen yal anebdu. Dɣa, imir-nni mi nesteqsa Malika Meɛtub ɣef tsebbiwt, tenna-yaɣ-d teqqen ama i wallalen neɣ i tegnatin n teswiɛt-nni, maca yezmer ad d-uɣalen s kra d amaynut.
Mhenni Xalifi