Yeffeɣ-d wammud n tmedyezt « Lbenna n usefru » n Kenza n Ǧerǧer, deg useggas iɛeddan (2015), ɣur teẓrigin « Aframed ». D adlis amecṭuḥ i yettawin ugar n 60 isefra, yal yiwen yemgerrad ɣef wayeḍ seg tama n yimeslayen i d-tesres deg-s tmedyazt. Aṭas n yisental iɣef tessefra Kenza deg wammud-is amenzu, ama ɣef nnif, lmeḥna, lasel, ddunit, tijmilin i wid yeɛzizen fell-as… Ladɣa ladɣa ɣef tayri. Win yeɣran adlis-nni, seg uwellih amezwaru, ad yerr tamawt dakken ṭṭuqten deg-s yisefra n yiḥulfan d leḥmala, am zun ala deg uɣanib-nni (style) i tettaf iman-is ugar tmeskart. Dɣa, tenna ɣef waya deg yiwet n tdiwennit: «Ḥemmleɣ ad ssefruɣ ɣef yal taɣawsa, wanag ttafeɣ iman-iw ugar deg yisfra n tayri acku yes-sen i d-lḥiɣ amecwar-iw». Kenza deg wammud-is daɣen tbudd-d i yimeɣriyen ala aɣanib aqbur n tmedyezt, imi deg yal asefru ad d-naf annect-n, ama seg tama n talɣa neɣ n tmeɣrut. «Tamedyezt tatrart i d-yennulfan taggara-ya teččur d amcubbek, akked usderwec-nni bu tegniwin n usugen, dɣa nekk ur kcimen akkit deg-s, maca ur mgal-is i lliɣ daɣen. Seg zik maleɣ ɣer uɣanib aqbur, yehwa-yi dɣa d abrid-is i mazal ṭṭafareɣ». I d-tenna Kenza. Isefra akk i yellan deg udlis-n sɛan akk inumak-nsen s ccbaḥa n wawal i ten-yebnan, ɣas ma qrib d imecṭaḥ neɣ d iwezzlanen i yellan merra, azal n sa(07) seg-sen kan i yettawin aṭas n yifyar, lameɛna yal ameslay seg-sen ijebbed imiɣri akken ad t-yekfu. Ma d ayen icudden ɣer uzwel n wammud « Lbenna n usefru » i as-tefka tmedyazt, s tmuɣli-s nettat tudert ur tesɛi maḍi lbenna war asefru, daymi tefren isem-nni i wammud-is, dɣa tenna deg yiwen n usefru: Lukan mačči d asefru, Amek ara nqabel uguren, Lukan mačči d asefru, Tayri d acu ara tt-icebbḥen… Ayyuz i Kenza, nessaram-as afud ijehden ɣer sdat.
Kaysa Xalifi.