Deg tama n At Ɛebbas, i d-yezgan deg unẓul n twilayt n Bgayet, asnefli ixuṣ deg waṭaṣ n yiḥricen. Krad n tɣiwanin cuddent ɣer tama-agi: At Ṛẓin, Buǧlil lakked Iɣil Ɛli. Tiɣiwanin-agi xuṣent aṭaṣ deg wayen yeɛnan aman n tissit. Ulac taddart anda tcercuren waman deg laɛyun yal ass, acku aman xuṣen deg yiqudas. Wid yesɛan akka zher seɛun aman yiwen wass deg krad n wussan deg yixxamen nsen. Llant tuddar ttilin waman degsent tikelt deg 15 n wussan, am taddart n Lqelɛa i d-yezgan s kra n 25 ikilumiṭren ɣef uqerru n tɣiwant n Iɣil Ɛli. Lḥaṣun yiwen n lḥif d-amuqran. Medden zemren ad ṣsebren i waṭaṣ n lixṣaṣ, maca aman lakked d wučči d-awezɣi. Deg tama nsen, imḍebren n tɣiwanin-agi ur xdimen ara ttawil akkeni ad ksen tazɣent-agi n waman n tissit, yettuɣalen d-agnu amuqran yagi deg unebdu! Medden yeṭaṭṭaf-iten fad deg unebdu, imi aman txuṣun deg iqudas n userbi. Ayagi, yettdemir aṭaṣ n twaculin akken ad d-aɣent aman n sitirnat i ttxelliṣen akka ger 1000 d 1200 idinaren. Llant tiwaculin ur sɛint ara tadrimt ilaqen, ɣef ayagi tagument-d aman am zik-nni s yicmuxen. Ayagi i gellu-d s kra n waṭanen, imi aman i d-tagumen medden ur zeddig-it ara akkit. D-acu, llant kra n tuddar deg tama-agi n At Ɛebbas, ur ruǧan-t ara imḍebren n tɣiwanin nsent akken ad skeflen aɣubel-agi n waman, i d-yettuɣalen seg wezɣal ɣer wayeḍ. Llant tuddar, ma d-nini akka d-imedyaten ilaq wiyaḍ ad ḍefren. Tella taddart-agi n Muqa, i d-yezgan deg tɣiwant n Iɣil Ɛli. Asmi nḥafen imezdaɣ n taddart-a seg lixṣaṣ n waman, kren akka deg yiwet n twizi anda i d-rran tiɛwinin ɣer yiwet akken n tbettit n siman i bnan s yifassen-nsen. Aman-nni « cuden-ten » ɣer yiqudas i kecmen akk ixxamen n taddart-agi n Muqa, seg wass-nni, imezdaɣ ur sɛin ara aɣubel n waman. Wigi llan yal ass, yal saɛa deg laɛyun n waman! Amedya nniden: taddart n Tigrin yellan deg tɣiwant n Buǧlil am akken teḍfer Muqa, terna i lǧehd n waman imi imezdaɣ-ines ɣazen yiwen n lbir s ttawil n « ṣunda », akken ad ssufɣen aman n tissit ar ad cudden ɣer yiqudas yettawin ɣer yixxamen nsen. Tigrin tenḥaf ula d nettat seg lixṣaṣ n waman, imi aman llan ttasen-d tikelt kul 15 n wussan.
Syphax Y.