Tamedyezt taqbaylit simmal ttlalen-d wid i tt-iḥemmlen ad tt-ḍefren, wid i d-yettmeslayen s ccbaḥa n wawal, neɣ s win umi qqaren asefru. Asefru ihi yessra-yas bab-is ad as-yili d tawwurt n wayen ixezzen deg wul-is, amedyaz i yezgan yettaru yessefray yessen azal n uqeddic-is d wayen yezmer ad d-yefk d abaɣur i tutlayt-is i yettɛebbi d anezgum n yal ass. Daymi yettili dima d win yebɣan ad d-yessken tamuɣli-s i wiyaḍ, ad tt-walin ad gzun anamek n wawal-is. D ayen i tga uletma-tneɣ tilemẓit Nurya Diri i d-ijemɛen ddeqs n yisefra, tessufeɣ-iten-id d ammud-is amenzu sɣur teẓrigin «TIRA Editions» deg tuber 2015. Azgen n useggas segmi d-yella wammud-nni gar widak nniḍen i d-yennernan send-is. Wid i t-yeṭṭfen gar yifassen-is yeɣra-t s lebɣi, ad t-yaf yeččur d isefra n uḥulfu, tuget seg-sen heddren-d ɣef lmeḥna d leḥzen, war ma nettu tugniwin n ṭṭlam i d-yesberebren fell-asen daɣen. Acku heddren-d ula ɣef lmut, , iẓekwan, idammen, iɣsan, akked wayen merra icudden ɣer tmedyezt taberkant imi d aɣanib-n i tettaru i tesmenyif Nurya ugar n wiyaḍ. Tenna deg usefru “ Imeṭṭi n meɣres”:
Imi tudert-iw tedrem Seg-i ur tettilim S lmut ad teddrem Gar nnger ara d-tilim
Ad cerrgeɣ tafekka n meɣres Ad snegreɣ ijeɣdan n tefsut
I tudert, lmut ad tessut Ad d-yeggri yimeṭṭi n meɣres…
Ula d takcumi yezmer ad ten-yekcem yimeɣri xersum s drus n rray. Yettusemma ɣas ma ahat kra seg-sen s tiqsiḍin i ur nelli n tidet neɣ n tilawt iɣef ttwabnan am waṭas n yisefra niḥqa, wanag yezmer yiwen ad tent-yedder am akken ur d asugen, ur rgen akin seg tilawt. Aya ɛla ḥsab ayen i d-tenna tmeskart-is, i d-yennan daɣen dakken d annect-n i tt-yeǧǧan ad as-tefren azwel «Gar tirga d tilawt». I win d tin yebɣan ad fken afud i tmedyezt taqbaylit, i widak i tt-iɛecqen s nettat d temsirin-is, i wid iran ad d-aɣen ammud-a ad t-sɛun d ayla, atan yettnuzu tura deg temkarḍiyin n Bgayet di leɛḍil alma ires deg yidigan nniḍen, yella deg teẓrigin «TIRA Editions» daɣen. Afud ijehden i Nurya Diri.
Kaysa Xalifi