Ahat tikwal ttmaggan da ed din kra n yiqeddicen s wazal-nsen, s waṭas n unadi ed unɛettab, maca ur ttawaḍen ɣer yifassen, ur yettizmir daɣen yiwen ad ten-yaf deg tnedlisin ɣef tsebba-ya neɣ d ta. Adlis i d-yessufeɣ, s tallelt n Tdukkla Tadelsant Adrar n Fad, gma-tneɣ amedyaz anaẓur Lxeyyer Brahimi s uzwel n « Yal azamul yesɛa azal » d yiwen i ur ilaq ad yezgel kra n win yebɣan ad yeṭṭef deg tgemmi-s tangawt (patrimoine matériel) s xilla n uḥraz deg teɣzi n tsutiwin. Deg-s ad yaf yimeɣri ayen akk icudden i uqennuc; swacu i yelha ad t-tebnu tmeṭṭut, anwi d allalen i yettwaseqdacen deg tẓuri-ya alama i ihegga i tuqqda deg uɣud, maca daɣen d acu i d anamek i yesɛa yal azamul yettwareqmen, imi akken i d-yeqqar uzwel, yal azamul yesɛa azal, yal irit tebɣa ad d-tini tmeṭṭut kra yes-s, ama ɣef tudert, ɣef lḥif i tettidir, ɣef tumert, ɣef tmussni, neɣ ɣef lebɣi-s yeffren ed wayen akk yellan d tigezzi (lbaḍna) ; d amawal n rrqem, skud zik mi ulac tira ed usenfali ɣef ukaɣeḍ, rrqem yeṭṭef mliḥ amḍiq-nsen. Deg udlis-a, yeɛreḍ umeskar-is, s tallelt n kra n yimdukkal, ad d-yegmer seg temnaḍt n Ayt Smaɛel, sɣur temɣarin ladɣa, ugar n 40 d azamul i d-yettbinen deg tugniwin s usemmi ed kra n usegzi-nsen. D aqeddic i yemuggen deg teɣzi n wayyuren, almi ɣer taggara tefren tdukkla n Udrar n Fad ad t-id-tessufeɣ, imi anezgum n tneggarut-a yezga kan d asekfel n wayen akk yellan d idles, n wayen akk yellan d tigemmi, d tangawt neɣ d turtangawt. Ass-a deg wussan ur d-qqimen waṭas seg-s, maca win i t-yebɣan yezmer ad yesnermes (contacter) tidukkla ɣef i d-newwi awal, i ara igen amek ad yaweḍ s ifassen.
Mhenni Xalifi