Yiwen wass, lliɣ kesseɣ nekk d tmeṭṭut-iw kra n yiɣersiwen i nesɛa deg akud-nni. Aqelwac d aberkan bernen wacciwen-is, taɣaṭ d tuzyint d tacebḥant, sin yiɣiden d iberqacen, d imelḥanen, tturaren, ṭṭinigen am uḥbac, tixsi, tebra kan i yimezzuɣen-is akk d yiwen yizimer yeṛwa. Ttaggadeɣ ad i yi-cckeḍ acku win yeṛwan yexdeɛ Rebbi. Nniɣ-d, ad ɛeddiɣ ad cerweɣ aslen, ad att ččen deg iḍ d imensi. Uliɣ sufella n teslent. uffiɣ tiweḍfin ttzzalent ɣer umahil. Qeddcent s nniḍam d lferḥ. Yal yiwet d acu n tɣawsa i d-tezuɣer yid-s. Ta tewwi-d aɛeqqa n yirden, ta tebbubbed abeɛɛuč yemmuten, ta tewwi-d aḥbub, ta d aɣrum… Hebseɣ axeddim, ttmuquleɣ-tent, wehmeɣ di tebɣest, di tuddsa, di leqfaza i asent-yefka Rebbi !ɣelbent tizizwa ! Tiweḍfin, imi iyi-d-wallant, yeṭṭef-itent lweswas, uɣalent « aggressiγes ». Zzint-iyi, grent-iyi di tlemmast, dɣa bdant ttsuɣunt fell-i: -Acimi aka i-id-ttmuquleḍ? Nkkenti mačči d ssinima ! Kečč t-banneḍ-d « l’espion »! -Xaṭi, nekk d ameksa. Ceɣleɣ kan d laẓz-iw, ur xeddmeɣ ara tasertit. Bɣiɣ kan ad zreɣ amek i ttidirent tweḍfin. Ma ulac uɣilif, sɛiɣ kra n yisteqsiyen. Ẓedment-d fell-i, Cuddent-iyi s snasel, dɣa wwint-iyi zdat n uselway nsent: -Mass! amdan-agi yesɛa tawnafit anect ilat.Yesɛa aṭas n yisteqsiyen. Cukteɣ d aselmad neɣ d aneɣmas. -Hḍer ɣiwel! d acu tebɣiḍ? -Tamezwarut bɣiɣ ad zreɣ ma tesɛamt « Syndicat » Ha ! Ha ! Ha ! d acu-t akka wagi ? neɣ d agraw-nni n Sidi claɣem ? Nkkenti ur nuḥwaǧ ara « Syndicat ». S uxeddim kan i nettqabel uguren. Nxeddem syimenzayen n-Jean de la Fontaine i yeqqaren : « Ulac acemma n rrebeḥ ma ula cwiṭ n uxeddim. » ur gziɣ ara belli tiweḍfin sɛant anect-a n tmussni ! Tenwiḍ ihi tiweḍfin tiɛeggunin ay amdan aḥeqqar ! Ticki id-yeɣli yiḍ, ad nebdu taɣuri n yidlisen ɣer tafat n tcemaɛt .Amer nesɛi trisiti am kunwi, ad nexdem awezɣi! -Acḥal …? -Dayen !berka isteqsiyen! T-deggreḍ-iyi acḥal n lweqt ! Assmi ara tissinem s izzayriyen azal i yesɛa lweqt d uxeddim, ad cbun timura yettazzen ɣer zdat yecban tamurt n Legniz i yeqqaren <<time is money.>> -fket-as kra n tyitwin ɣer tuzert n weksum i wezzayri afanyan, imir err-as tileli, ad yuɣal ɣer twacult-is ! Fkant-iyi-d azal n mraw n rkulat.Azagur-inu mazal iqreḥ-iyi ar ass-a.
Busad ¨Hemmar