Mazal kan kra n smanat akken ad yaweḍ waggur n Remḍan ! Ɣef ayagi, tiɣiwanin i d-yezgan deg twilayt n Bgayet theggint akken ad ferqent idellaɛen n Remḍan. Aseggas-agi, ahat aṭaṣ n twaculin ara yessutren adellaɛ n Remḍan, acku tamɛict tuɣal ɣlayit tagara-agi. Tezad trisiti, izad liṣanṣ, laɣramat, asiweḍ,…ayagi ḥulfan akk yes tiwaculin, yagi tid yettaɣen tadrimt ger 18 000 alarmi d 25 000 idinaren i waggur. Cahriyat-agi uɣal-ent ur d-keffunt ara i twaculin yesɛan nnig n sin n medden! Ihi, yezmer lḥal ad kecment tiwaculin « timaynutin » ɣer wannar n-usuter n lemɛiwna n ddula, yellan akka deg yiḍellaɛen n Remḍan. D-acu kan, nezmer ad d-nini belli idellaɛen n Remḍan ur d keffun ara, imi isufar i yellan s daxel-nsen ur d-keffun ara i waggur akk n Remḍan. Ayagi mači dayen yessefraḥen… Deg Remḍan-agi, llan kra n yimerkantiyen ad ldin iwumi ssawalen « Asečču n raḥma » (restos de la rahma) deg tɣiwanin, anda mti yedden ad ččen igellilen akked yimsebriden. D-acu kan, ngar tamawt, isegassen-agi ineggura, asečču-agi n raḥma yenqes aṭaṣ, yagi deg tama n tɣiwanin, i d-yeqqaren akken « ulac tadrimt » akken ad ldin asečču i yigellilen ! Si tama-ines, Agur azeggaɣ Aẓẓayri i qeddec, i rennu-d afud i lemɛiwna n twaculin yenḥafen. Iseggasen-agi ineggura, aṭaṣ n tzeqqiwin n wagur azeggaɣ i yeldin tiwwura nsent, am tin n Iɣil Ɛli, i ferqen akka idellaɛen n Remḍan ɣef yimdanen yeḥwaǧen. Ussan-a, aten-ad ǧemɛen isufar akken aten ferqen ɣef iḍellaɛen ara i ruḥen srid ɣer tiwaculin yellan akka deg lixṣaṣ. Ula si tama-nsent, tiddukliwin tthegint ula d nutenti i waggur n Remḍan. Aṭaṣ degsent ferqent iḍellaɛen d-ilmawen ɣef ikumirsiyen akken ad gren tiɣri i medden ma yella kra n yisufar ara sedqen! Akka ihi, tagmatt i waggur-agi n Remḍan tebda « s-uẓeṭṭa » ussan-a akken tiwaculin ur nesɛi ara ad sɛeddint aggur n Remḍan mebla lixṣaṣ.
Syphax.Y