Gar yinaẓuren izwawen imserriyen, i ḥemmlen tiɣimit deg tesga, yella Wazib Muḥend Ameẓyan. Dɣa, imi zgant ttegriwilen ɣer kra n win i d-yefkan am acemma i tezlit tazwawt, ed tmaziɣt s umata, rrant tdukkla ACAOH ed tesbeddit Tiregwa tajmilt s wazal-is i unaẓur Weɛzib Muḥend Ameẓyan, acer (lḥed) n ddurt yezrin, amenzu n mayu, deg tmurt n Kanada. D tajmilt i swayes yecreh ayendin wid terza taluft, akked wid i yeṭṭafaren idles merra, imi ḥsan belli win umi tuɣal yuklal-itt d tidet, s yisem-is d ameɣnas i yeqqimen d imekdi (fidèle) i yimenzayen-is (principes) seg tazwara. Ad d-nerr awellih dakken ilmend n tirza-ya yecna Weɛzib dinna deg Muryal deg yiwen n ttiɛad n ucmummeḥ akked usmekti n zzman-nni n tezlatin icuban tirsasin, lwaḥi d yizwawen iɣriben i t-yettɛuzzun, i yecnan ula yid-s. Ma nemmeslay-d s ugezzul ɣef umecwar n yiseɣ n Weɛzib Muḥend Ameẓyan. Ad d-nebder tamussni-ines akked umeɣnas i aɣ-yeǧǧan Leḥsen Beḥbuḥ, almi dɣa i t-idegger uneggaru-ya ugar i wannar n timmeɣnest. Syin akkin, seg yiseggasen n sebɛin, ar tura yessekles ugar n 27 n yiseɣraz (albums) gar wid i d-yeffɣen deg yiḍebsiyen n zik, deg tesfifin, ed yiḍebsiyen n tura. Gar tezlatin-is yettwassnen, tella « Ay at wawal » anda yettelɛa atmaten-is s usirem n timmeɣnest belli ɣas ad iruḥ yiwen wayeḍ ad d-ilal, ma ɣer deffir ur nettuɣal, « Ay itbir ɛelli » i d-yettmeslayen ɣef wasmi tebda tettifrir tagut ɣef tmaziɣt, « Nekk teḍra yid-i » i yecna akked uɣewwaɣ Lwennas Meɛtub, ideg yekcem s wawalen ula deg tmedyezt n yiɣsan i nessen tura, akked waṭas n tiyaḍ!Weɛzib d win izedɣen ulawen n waṭas n medden, d inaẓuren neɣ uhu, ɣas ur iḥemmel ad d-iban aṭas. D amedya n Malika Dumran, asmi i d-tusa i Udrar n Fad d tinebgit n yiseɣ n tfaska n tmedyezt, deg meɣres n 2015, d Weɛzib Muḥend Ameẓyan i tefren ad yecnu yid-s!
Mhenni Xalifi