Yiwen seg wid i d-iheyyan tafasaka tis sebɛa n ccna amaziɣ deg temdint Bgayet, deg wawal-is, yenna : “Anda-tt rradyu Sumam ?”. D tidet, ulac-itt, tɣab, wissen ayɣer ? Ma d rradyu tis snat, tella, teḥḍer akk i ssmana-nni n leqdic n tfaska. Nnig waya, tesɛedda tameɣra taneggarut qbala ɣer Lezzayer, tɛedda-d en direct i yimsefliden deg lemwaji n rradyu tis snat. D wa i d le professionnalisme neɣ ala ?
Ma d tin n Sumam, tusa-d ass amezwaru, tuɣal-d ass aneggaru. Meɛna, tettas-d i wučči yal ass, ma d isallen ɣef tfaska ulac ! Ayɣer ? Rradyu Sumam, deg wakken akk neẓra, tettunneḥsab d rradyu n Bgayet, d yiwet seg rradyuwat n temnaḍin n Lezzayer. Yewwi-d fell-as ad tili anda yella kra deg temnaḍt n Bgayet. Yewwi-d fell-as ad tessiweḍ isallen i yimsefliden i yettxellisen s yidrimen-nsen ɣef wanect-a. Yewwi-d fell-as, daɣen, ad teddu akken ddan waman ; d tafaska n ccna amaziɣ neɣ d tafaska n l’uncudda lwaṭaniya, ad tsiweḍ isalli-ines ɣer uceɛbi arqaq, ad tṭixreḍ imir i ugdud ad t-yessiff. Dɣa, d agdud kan ara yessiffen iẓid akken ad as-yekkes aclim.
Meɛna, d tidet. Yenna yakan umedyaz, nettaɣ-itent nḥellu ! Uma kečč,; amek akka ? Nettu yakan aseggas-nni n 2001, deg lawan-nni n leɛruc, asmi d-ddan akk yid-sen, wa s nnif, wa s lḥif, wa s bessif ! Aseggas-nni, rradyu Sumam, serɣen-tt. Ulac win ur neẓri ayɣer ?
Ziɣen, ilaq ad terzu rradyu tis snat seg Lezzayer akken ad texdemn ccɣel n tin yellan da. Ihi, tajmilt tameqqrant i rradyu tis snat d tanemmirt tameqqrant i Zira, Hamid d wiyaḍ akk i d-yeddan yid-sen.
Dj. Ikhloufi