Ass-nni n ssebt i tekfa temsizzel taɣelnawt n ccna amaziɣ i d-thegga tiddukla tadelsant ‘’Tarwa n Gaya’’ n taddart n Redjaouna, taɣiwant n tizi Uzzu. Teḍra-d temsizzelt-agi deg uxxam n yidles Mulud Mɛemmeri, deg temdint n Tizi Uzzu. Timlilit i yellan, tikkelt-a, d tajmilt i ucennay Brahim Izri, yemmuten ass n 03 yennayer 2005 deg tmurt n Fransa. Deg temsizzelt-a, ufrarent-d snat n trebbuyaɛ n ccna( yiwet n tmurt n leqbayel, tayeḍ n yicawiyen) akked yiwen n ucennay atergi. Tadwilt-a, i d-ijemɛen yal ṣsenf n ccna n tmurt n Lezzayer : aqbayli, acawi, atergi, atg, tella-d s lmendad n Usqamu aɣerfan n twilayt ,Tanmehla n yidles n Tizi Uzzu akked tɣiwant n temdint n Tizi Uzzu . Deg wahil i d-yellan ɣef teɣzi n 4 n wussan, ad naf tugniwin akked yimagraden i d-yemmalen amecwar n unaẓur Brahim izri, asarag i d-yewwi mmi-sYani akked yimeddukal n baba-s, yecban Dda Bous, Nassima Chilaoui n Beurs FM, Farid Galaxie n Télévion Berbère…d wiyaḍ. Am wakken i d-tella tirza ɣer uẓekka n Brahim Izri i yellan deg Zzawiya n jeddi-s Lḥaǧ Belqasem, ass-nni n lexmis iɛeddan.
H.M