Yiwen n uneḥkam, iḥkem s ẓzur ɣef yimezdeɣ-is, ur iḥemmel ara wi t-ittnamaren wala wi ittruẓun awal-is. Mi meẓẓi, mi yella d anelmad di temdint n Qayrawan, anda ilemmed leqran, tajerrumt, tusnakt d ccraɛ n Sidi Xlil, isɛa yiwen n umeddakkel, iḥemmel-it am gma-s. Mtawan, ddukulen am yiḍuden n ufus, werǧin ifferkra fell-as. Illi-as ul-is, lbaḍna-s akkiẓra-tt. Yiwen wass, akken ad imsex, ad ixelleṣ imezdaɣ n yiwet n taddart, i t-iserfan mi t-numren di leḥkem, iceyyeɛ lɛeskeṛ-is, kecmen akal-nsen, ẓedmen fell-asen. Urɛad yenṣif wass, isla I yiwen ittnaji lqedṛa n Ṛebbi d ṣelṭan.Yenna-as uneḥkam : d acu i k-id-icqan akka mi tettnajiḍ Ṛebbi d lawliya ? Yenna-as urgaz :-nekk d leflani, mmi-s n leflani. D ameddakkel-nni-inek n Qayrawan, win akken ɣef tettnadiḍ acḥal-aya. Iḍfer abrid n din, issedreg iman-is, ilha-d kan d ttuba. Aneḥkam ifreḥ nezzeh mi t-id-imlal.Seg lfeṛḥi t-issefṛaḥ, lemmer I as-yenna ɛfu I yimezdaɣ n taddart-a, urwaleɣ ara amek ur as-ittaɣara awal, ɣef wudem-is ad yeɛfu I yimezdaɣ n tmurt-is. Ɣur-s isɛa azala meqqren. Iwala-t ittwaqelleq, udem-is iḥzen, yeččur d anezgum. Mi yeɛreḍ ad as-ikkes aqelleq akken ad t-yamen, d timerna I yerna. Ittban-d am yiwen inṭaṛren aṭas, am win icɣeb kra. Yenna-as uneḥkam : – D acui k-yuɣen ?Yella wi k-iḍelmen ? Argaz :-Rnu-iyi-d, tilawin akk n tiɣremt akk wwin-tent, ṛuḥent ur d-banent ara, ttuɣebbant. Gar-asent tella yelli. Aneḥkam :-S Ṛebbi ! Lemmer d-tusiḍ ɣur-I iḍelli tameddit, ɣef wudem-ik yili ɛfiɣ akk I yimezdaɣ. Argaz :-d lmektub, d lweɛd I yebɣan tigi. Ulac d acu yezmer ad t-ixdem umdan ma yura kra n diri deg unyir-is. Imiren kan, aneḥkam issendeh wid i t-ittḥamin ad ruḥen ad d-awin akk tilawin ay ḥebsen. Wwḍent-d tlawin-nni, beddent zdat n urgaz d ṣselṭan, argaz iɛqel yelli-s. Yenna-as, ha-tt-n yelli ! Aneḥkam din yessendeh ad as-fken aḥurim swayes ara tɣumiman-is, ad as-d-rnun aɛawdiw ad tt-ǧǧen ad truḥ d baba-s. Mi tesla teqcict I yimeslayen-a, tɛeggeḍ : – «ala a Ḥemmad ala! Ur ttruḥuɣ ara, ur tedduɣ ara d baba wala d wid yekksen sser fell-i !» Aneḥkam yewhem d acu yesla seg yimi n tlemẓit, yenna-as : – D acu I tebɣiḍ ihi ad txedmeḍ a tameɛḍurt ! – Laqeɣ kan I walbaɛḍ n sselṭanat, ula d acu ara xedmeɣ d yemdanen ur neswi ara.Baba-s yewhem di yelli-s, tbeddel aṭas, yenwa tnekkeṛ-it, ur t-tḥemmel ara, imi tugi ad teddu yid-s. Imiren kan mi yesla I yimeslayen n yelli-s, leḥzen ikkes ɣef wudem-is, yenna-as a win ɣef I ttruɣ netta ur yettru. Yezzi ɣer-s uneḥkam, yenna-as :”acu meḥsub I tebɣid ad d-iniɣ deg yimeslayen-a “nekk ala iṣelṭanat Iwumi laqeɣ !” Taqcict :Ɣur-I yiwet n lbaḍna, ulac win izemren ad izux yesɛa-tt ala nekk ! Aneḥkam :-Tzemreḍ ad aɣ-tt-id-tiniḍ ! D acu-tt ? Anɛam ! Af-d yiwen yebɣan ad as-gezmen aqeṛṛu, awi-t-id ɣer da. Ternuḍ-iyi-d ajenwi iqeḍɛen, nekkini ad as-id-ɣreɣ kra n tṣuret, iles n ujenwi iqeḍɛen ad yuɣal yeḥfa am ufus n ujenwi-nni. Ur cukkeɣ ara yella yiwen dagi yebɣan ad as-gezmen aqerr u ad yemzel, ad yemmet a yelli ! Xemmem cwiṭ a Sidi, ahat yella win yebɣan ad yemmet ! Ur cukkeɣ ara !Nekk ad qebleɣ ad iliɣ deg umkan-is, yerna akken i t-id-nniɣ, ad as-id-ɣreɣ tasuret I ujenwi iqeḍɛen ad yuqqel yeḥfa. Ɛeddi ad kem-n wali ihi ! Tefren-d teqcict ajenwi iqeḍɛen, teɣra-d tasuret, tmekken amgerḍ-is I wakli, tenna-as : aha ! Winn-a s yiwet n tyita yesuffeg-as aqeṛṛu-is, inṭeg akin zdat n uneḥkam. Iɛeggeḍ, yeqqar :texdeɛḍ-iyi, ! Texdeɛḍ-iyi ! tkelxeḍ-iyi !Tilawin yellan din sɣertent, ferḥent imi I d-terra ttaṛ ɣef wayen iɛeddan fell-asent.Tcemmet aneḥkam. Mi d-yuɣal uneḥkam ɣer leɛqel-is, ifaq d acu i as-tebɣa teqcict, yečča times, tzuzen-it tkellex-it alammi i t-tcemmet terra-d ttaṛ. Baba-s, xas tɣaḍ-it yelli-s, tejraḥ tasa-s fell-as, yefraḥ yis-s imi tesɛa nnif d tirugza, tefren ad temmet wala ad tegri d yir tudert. Terra-d ttaṛ tessames-as ilebda I uneḥkam. Iɣewwes ɣef tfekka-s imrareɣ deg yidammen-is. Medden akk slan s wayen I texdem teqcict, tadyant-is ttawin-tt-id d amedya ɣef tirrugza d nnif. Aneḥkam werǧin I tt-yettu.Tadyant n teqcict tezdeɣ allaɣ-is I lebda. Awal sin ad ak-yini : ula yiwen ur iyi-iḥetterm neɣ ur iyi-ikellex slid yiwet n tlemẓit yesɛan laṣel n Yimaziɣen!
Ramdane LASHEB