Imalas yezrin imerra yekker uhetwir ɣef ukayad n Bac. Sya ɣer da, ha-t-an nnesren-d yiseqsiyen n tangiwin yemgaraden. Ɣas Facebook yessurugu-d am tala iseqsiyen.
Di tazwara, yella-d ukukru ma yella s tidet iseḥḥa wayan yeḍran. D acu kan, ur iḍul ara umecwar almi i d-iban d akken ayen yuzzaren deg uzeṭṭa atiknuluji yebna ɣef tidet, imi d iseqsiyen-nni i d-yettunefken. Massa Benghebrit, uqbel, dɣa ttiɛad-a, terra-d di ddehn-is akk ttawilat ara yesɛerqen asexdem n tḥila deg yikayaden-a. Di yal aɣerbaz, ttuheggantttawilat n usexreb n usiwel rnu deg waṭas n yimukan i d-ssukksen i yinelmaden allalen n tukerḍa. Meɛna waqila, nebɣa ad naweḍ s awal-nni yeqqaren: “a winijebbden amrar, ixef-is ha-t-a da ɣur-i.” Ziɣ imesḥaf-nni i d-ibeggsen ad sɛerqentikli i ugdud seg yiseggasen n 90 mazal ttenfufuden. Wamma, amek akka ara naweḍ ɣer teswiɛt yecban ta anda yiwen ijebbed, meyya kerfen. Akka tura, taneɣlaft n Usegmi ur teqqim ara di rrif imi tebda tettnadi ɣer tama n tamiwin-nniḍen ɣef win neɣ wid yellan deffir txazabit-a ara yekksen leqder ɣef uɣerb azzayri. D ayen,daɣ, mebla ccekk, ara yesruḥen azal i ukayaḍ-a ama di tmurt am di berra. “Tiɣilt i yekfan fell-aɣ, ad d-tban mazaltayeḍ.” I as-yenna umedyaz. Segmi i d-tusa Benghebrit s aḥric n leqraya, d abruri n tkerkas i d-yettmarayen fell-as. Ɣas akken tqubel s uxeddim d ṣṣfa aqejjem, meɛna tikkelt-a tiyita qessiḥet. Beggsen-d ad mḥun later n useggem, gguman ad qeblen awenneɛ n uɣerbaz, mi walan yiwen iger aqeddim ɣer sdat, ad rren sin ɣer deffir. Akken yebɣu yili lḥal, amezruy ad d-icehhed ɣef snat n twaculin-a iɣef d-yennaDjaout: “tawacult iteddun ɣer sdat, d tin itwexxiren”.
Radhia B.