Ttɛeddin yiseggasen, zerrin wussan mazal cfawat n tikli n 14 di yunyu 2001 reṣṣan deg wallaɣ n kra n wid d tid terza taluft n yizerfan n umdan. .
Uqbel tadyant-a, mačči drus I d-yeḍran deg unnar, tazwart-is d tin n1963 yessenfufden amennuɣ almi d 1976 anda I d-tekker yiwet n terbaɛt n yilmeẓyen, Massin gar-asen, iwakken ad d-ssufɣen tadyant-a n yizerfan s annar n uskasi, taluft iɣef yesberber udabu n lawan-nni. Mgal lḥif d zzeyyar, ur zmiren leḥbus wala leqyud ad rren timedlin ɣef wayen izedɣen amdan s timmad-is, imi tudert-is turez srid ɣer wayen ssuturen wid tezdeɣ tebɣest s amennuɣ. Ama d tadyant n 1985 neɣ d tanekra n Tuber 1988, agdud azzayri s umata, aqbayli beddemma yebges iwakken ad d-yesseɣres ayen akken iɣef yettuḥerrem. Tamaziɣt-nni izedɣen amdan tegguma ad taf amkan-is, ɣas akken yeḍra-d uɣunzu n uɣerbaz deg useggas n 1994, ulamma yella-d unekcum-is s aɣerbaz maca adeg I tuɣ d win ibeɛden s waṭas ɣef wayen I yettutajun. Rrebrab isers-d buberrak, tamaziɣt tetteddu ɣef yixf n tfednan, mi tger aquddin ɣer sdat, ad d-temmager iɣeblan. Lḥasun, taswiɛt mačči d tin yessefraḥen, tamurt d tin yenkedwaren imi tadrimt txus, tafunast-nni I d-yetteẓgen ǧǧan-tt yimeksawen, agdud irkeb-it lḥir. Asmi i d-ddukklent akk temsal-a, tewweḍ tfidi s iɣes, ḥuh yaf-as ixef-is ! Imi am yal tikkelt, d At Dwala I yettuḥazen deg tasa. Massinissa Guermah yessufeɣ rruḥ daxel n lkazirna n yiǧadarmiyen. Din teḍra, din terwi, awal yuzzel am lebraq, yuɣ-d timnaḍin n tmurt n leqbayel yernu ula d ass amzun akken yettwafran : 18 seg yebrir ! Taluft-a thubb-d am waḍu, timesbaniyin, asuɣu, aɛeggeḍ…D taḥemmalt, win I d-tufa sdat-s tewwi-t. Imi Iqbayliyen d wid iwulfen tijmuyeɛ, yal tamnaḍt tessebded wid ara yemmeslayen s yisem-is, seg axerrub, ɣer taddart almi tewweḍ ɣer leɛrac. Tamnaḍt n Leqser deg Bgayet tger irebbi-s I yiwet n temlilit s wazal-is anda tettujerred yiwet n tɣerɣert n 14 n temsal tid I izemren ad d-sersent talwit ma yella kra n tririt fell-asent. Din dɣa, i d-tettuhegga tikli tameqqrant n wazal n krad n yimelyan n yimdanen ara yewwten agerz di tmanaɣt. Yeḍra-d wayen i d-yeḍran, gar yimejraḥ d wid yessufɣen tarwiḥt, ayen yebɣu yili, d tikli n lqern ! Amennuɣ yuɣ akk timnaḍin n tmurt n leqbayel, yegla-d s terwiḥin n waṭas n yilmeẓyen ! 127 I iruḥen d asfel, amennuɣ I d-iḥellan amḍiq n tutlayt taɣelnawt I tmaziɣt uqbel ad tuɣal d tunṣibt deg yennayer yezrin. Ass-a, tidmi-nneɣ ad truḥ srid ɣer yilmeẓyen-a yeɣlin d asfel iwakken ad tifrir tafat fell-aɣ. Acku tatut n umennuɣ-nsen d timenɣiwt tis snat. Ṭṭest di talwit !
S. M