Taggara n talɣuɣa taɣelnawt n ddabex n uḍar tella-d s usuref n terbaɛt n yilmeẓyen n Leqbayel s amkan wis krad, mi akken medden rǧan akk amkan wis 2 i d-tḥella uqbel ad tecceḍ deg unnar n Ṣtif d umɛadal i d-tewwi sdat tarbeɛt n Wehran deg Tizi Ouzou.
D acu kan, di tizwar, tuget n wid iḥemmlen JSK irkeb-iten lḥir imi walan tarbeɛt-nsen tetturar ma ad teqqim deg uḥric amenzu neɣ ad tṣub ɣer wis 2. Wicqa ! Awidukan imi tessaweḍ s aswir-a. Iwakken ad yessuzef lḥif ɣef terbeɛt, aselway Moḥ Cherif Hannachi yessejhed JSK i useggas I d-iteddun s kra n tgejda yecban benkablia d Herbache i d-yusan seg ASMO, rnu ɣur-sen Yettou yellan yakan deg Larebɛa d uɛessas n ucebbak Malik Asselah i d-yuɣalen ɣer terbaɛt-is n zik. Ɣas akken imyurar-a d wid ara ibeddlen udem I JSK ɣer sdat, maca ur qniɛen ara yimḍebbren d ayen i ten-yeǧǧan ldin tiwwura i Adel Djerrar n terbaɛt n Relizane akked Redouani n USMA iwakken ad d-yernu tirmit-is ɣer tlemmast n unnar. Ɣef leḥsab n waṭas n wid yeṭṭafaren aḥric-a n waddal, d tikkelt tamenzut i d-yessefsi Hannachi tadrimt iwulmen i tiwin n yimyurar iwulmen, acku iseggasen-a ineggura nwala dakken tuget n wid i d-yenced ur d-wwin kra n umaynut i terbaɛt ma mačči d tiggulelt ama deg yiswan ama deg wurar icebḥen. Seg tama nniḍen, sin n yimyurar iberraniyen n tmurt n Burkinabé Diawara akked Malo yuzzel fell-asen wawal dakken ad uraren deg useggas i d-iteddun di tmurt n Maser. Diawara i d-tessuter terbaɛt n Zamalek ata-n ad iruḥ ɣer Semouha netta d mmi-s n tmurt-is imi tarbeɛt-a d tin i yessulin tafaṭurt i tella tettraju-tt JSK. D ayen ara d-yeskecmen mebla ccekk tadrimt meqqren i s ara tqabel terbaɛt n Leqbayel taswiɛt-a n uncad n yimyurar imaynuten.
S. M