Samir Ait Belkacem d yiwen gar izumal n yidles d tutlayt n tmaziɣt. Ilul deg taddart n Agni n Teslent deg Ʃin Elhemmam. Seg wasmi yella meẓẓi i iḥemmel ad yettales i wunuɣen yettembiwilen (doublage) s tutlayin-nniḍen, abeɛda s tmaziɣt.
D netta i d amenzwaru deg tmurt n leqbayel i yessawḍen ad ixdem Pučči. Ixdem-it kan akka tazwara, syin ulac win ur t-nwala ara, ama d imecṭaḥ, ama d imeqqranen. D ayen yesferḥen Leqbayel. Yettwassen aṭas segmi i d-yerna ɣer warrac imecṭaḥ segmi i d-yerna Limučuču d wid-nniḍen. Yebda leqdic-a deg useggas n 2004, yerna-d, sakin, iḥricen-niḍen n Pučči, Nerniya , Da Spilu, Iferfucen,Limučuču , Aɛli d Waɛli , Ipespusen , Črak d waṭas-nnniḍen . Isura-a n Mass Ait Belkacem, tettili-d d allalen i sseqdacen yiselmaden deg waṭas n yiɣerbazen imi i ten-ḥemmeln yinelmaden. Rnu ɣef wanect-a, lemmden-d aṭas n umawal n teqbaylit, ladɣa arrac i izedɣen timdinin. Samir Ait Belkacem, ixeddem seg wul-is, iḥemmel ad ineqqi ccɣel-is, yerna xuṣṣen aṭas n wallalen. Xas akken, meɛna axeddim-is ur as-teqqareḍ ara seg ulac i t-id-yessuffeɣ. Usan-d ɣer-s ula si Marikan walan amek ixeddem, wehmen deg-s. Yesɛa yiwet n terbeɛt xeddmen yid-s s tumert. Tetteki ula d tameṭṭut-is d yelli-s. Yeqqar-d Samir d akken axeddim-agi ur yeshil ara, imi tikwal ur yettwali ara tawacullt-is acḥal n wussan. Yal win ara d-yuraren, ilaq ad d-yettales alamma yeffeɣ-d ṣṣut-is akken ilaq. Aya, yettaṭṭaf aṭas n wakud. Ha-t-an, tikkel-a la d-yettheggi Samir limučuču 4 ara d-yeffɣen ussan-agi n yunyu. Ttekin deg-s ama d icennayen , imyura, inaẓuren, imedyazen, d win iqeddcen deg umezqun gar-asen : zedek Mouloud,Abdelhak sahel ,Hamid Mouali, Brahim Medani, Yousef Hessas, Ali Amrane, Hadjira Oubachir, Massi lewhama, Belaid tagrawla, Tawes Arhab, Nouriya, Mohamed Allawa…atg. Mlalen-d akk akken ad awḍen ɣer yiwen yiswi : asefraḥ n wid i yettraǧun acḥal aya acu ara d-yesuffeɣ Samir.Tikkelt-a, am akken i d-yenna Samir, yefreḥ imi leɛtab-nni yeffeɣ ɣer tafat. Nessaram-as afud igerrzen imi mazal-as amecwar ɣer sdat. Abrid i d -nejren imezwura , ad neddu deg-s akken tamaziɣt ad tennerni , ad teǧuǧǧeg. I usmekti, Samir Ait Belkacem yewwi arraz amezwaru deg tfaska n usaru amaziɣ i d-yettheggay, yal aseggas, Useqqamu Unnig n Timmuzɣa.
Zakia Ben yahia