Ttlata, 21 deg yunyu La d-tettban ciṭ n talwit ɣef wugur-nni n waman seg tama n Yilelten. Ma deg Tigzirt, serḥen i waman ad lḥun: aɛummu deg yiḍ deg wass ɣas ulamma rrif-nni kan, deg Wat Wagennun, taswiɛt ur tessefraḥ ara ma numen aselway n tɣiwant Mass Chabane.
Larebɛa, 22 deg yunyu Deg uẓɣal-agi, la d-qqaren ala Tamda Ouguelmim i d leslak : d lǧennet deg tlemmast n tmurt n leqbayel, tettak abriḥ i turin i d-nnan wid-nni i iruḥen ɣer din. Yal wa d abrid-is, kra n yimezdaɣ n Tubiret, rzan ɣer la Daira, bedden din. Ma d imyurar n MOB, ugin akk ad mmbiwlen, ugin ad sleɣmen, maḍi : tadrimt trebba aqacuc . Aldija, tacennayt taqbaylit, terza-d ɣer uxxam n La Dépêche de Kabylie n Tizi Ouzou. ‘’Tismin n tnuḍin, yenɣan argaz ur yuḍin.’’
Lexmis, 23 deg yunyu Deg unebdu, tettuɣal tmurt n leqbayel d la salle des fêtes : ha-t-an,ihi, tmeɣra n lfeṭṭa deg Wat Yanni, taggara n yulyu. Ula d times, texdem tameɣra deg ssuqq-nni 2000 n Bgayet, tesreɣ-it akken ma yella. Ula d ayefki tesreɣ-it ssuma-s : 30 idinaren kan. Cwi kan deg Amizour dewren-tt ɣer umeslay ɣef uselmed n tmaziɣt, unfen i lmakla.
Ssebt, 25 deg yunyu yuɣal-d Lwennas, uɣalent-d tid-nni : uletma-s akked tmeṭṭut-is. Yal ta, teṣseḍlam tayeḍ. Ma d l’enquête-nni, anda tuffeg i ters, wissen kan mi akka i d-yerna ɣer unnar Nordine Ait Hamouda., ma ad d-yili kra n ujdid. D BAC, ad d-yili ɣef wakken i d-nnan.
Lḥedd, 26 deg yunyu D tijmilin i Matoub deg yal tama n tmurt, ‘’Si Tqubɛin ɣer Wat Ziki, idles-nneɣ d anagi…’’. Ihi, Si Tala Bounane ɣer Boudjima, tikkelt-a din i as-yerra Zedek tajmilt : yal wa s kra iwumi yezmer…Ma deg Lezzayer tamanaɣt, ihegga-d uselway n tɣiwant n Lezzayer talemmast, yiwen imensi anect-ila-t. Kra ttnadin ɣef win yeččan, ad t-wwten, wigi, ttwalin win yelluẓen i wakken ad t-seččen…