Tamussni i d-aɣ-d ğğan lejdud-nneɣ, ur tt-id wwin ara seg uɣerbaz, neɣ seg tesdawiyin, maca sefrurin-tt-id seg tmussni n tudert-nsen n yal ass. Tamussni ɣur-sen, d ajgu alemmas n tudert n umdan, axeddim yis-s d lssas n usnerni d usirif ɣer sdat. Ur tenfiɛ ara weḥd-s, acku ilaq ad tenneḍ deg ubernus n ttrebyya, i d-irennun i umdan lqima d lkarama. Tamussni tcudd ɣer liman, yenna Luqman ideg lewṣaya i mmi-s: ‘’a mmi, am wakken ur d-tettṣab ṣsaba alamma s waman d wakal, ur yenfiɛ liman siwa ma s tmussni d uxeddim.’’ Lejdud-nneɣ, ffeɣen-d deg uɣerbaz n tuddert. Aɣrebaz-agi, yettjerrib-iten ddima, syin yesselmed-asen timsirin d temɛaytin(d yinnan), lemden ɣef ufus n uselmad i iweɛren mačči d izli. Maca lewɛara-s, trebbi-d irgazen, trennu tettṣeggim tisuta [asget n tsuta (lğill).], terna tessemɣay-d asirem deg tuddert-nsen. Tessefham-asen-d lesrar n ddunit, yerna tesselmad-asen ayen ilaqen ad t-issinen. Tesselmad-asen amek ara zerɛen lewqama d leṣlaḥ s leɛqel, amek ara sɛun lebɣi i tigawt neɣ i uxedim mačči i wawal. Syin, yuɣal leɛqel-nsen (llmux-nsen) yugger ameslay-nsen, yesselmed-asen d akken tamussni mačči d lqewwa, maca lqewwa tettilli deg usexdem d usleɣmu (aṭbaq) n tmussni-a, rnu ɣur-s cbaḥa n tmussni, tettbin-d deg leṣlaḥ neɣ awenaɛ n uexdim.
Adaoun Abdelghani