Ttlata, 05 deg yulyu D asmekti n 05 deg yulyu 1962, asmi i tewwi Lezzayer timunent-is. Acu ɣer Remaḍan, mazal ccek, mazal ur d-iban waggur n Caban neɣ n…I wakken ad t-rǧun, amur ameqqran yerza ɣer leryaf n lebḥar, meqqar din, llan waman, wamag deg tberninin n Mâatkas, ulac ula d tiqit. Ɣelqen la station Wat n Tsadurt, ayen yeǧǧan anemhal n ADE n Tizi Uzzu, ad d-yini : ‘’ɣelqen aman, u nutni la d-qqaren ur nettruḥu ara sya alamma uɣalen-d. amek ara d-uɣalen, ma yella ur asen-serḥen ara ?’’ D taqnuẓt, anwa ara tt-id-yafen ?
Larebɛa, 06 deg yulyu D lɛid, dayen walan aggur. Walan-t deg Suɛidiya, donc, c’est fini d lɛid. ‘’Ma nnan-ak lba, d lba, llif mačči d lhemza.’’ Ula d Leqbayel, mmsefhamen nutni. Walan d akken ilaq ad uɣalen ɣer leɛwayed n lejdud. Ihi, kkren xedmen lewziɛa neɣ timecreḍt deg yal tama n tmurt-nsen. Xedmen-tt ula anda-nniḍen ɣef wakken i d-yenna uɣmis ‘’La dépêche de Kabylie’’. La d-yeqqar ‘’Aḍar la iteddu s aẓar’’. Meqqar ad ttun lǧib yeqqersen.
Lexmis, 07 deg yulyu ‘’Si Tqubɛin ɣer Wat Ziki, idles-nneɣ d anagi’’ i as-yenna winna. Iḍelli kan i tewwi Lezzayer timunent, wiyaḍ la as-qqaren, ass-a deg Wat Wagennun, d nnuba-nneɣ. Cwi kan yekfa Remḍan, wamag ad terwi gar yimdanen akked yiɣallen n laman. Xas ulamma d lḥamu dinna, acu kan tella Albraü ! ‘’Smir, sgerger, feggeḍ.’’
Ssebt, 09 deg yulyu Terɣa tmurt mačči d izli. Deg tmura n medden akk, d tignawt i iḥekkmen deg uẓɣal, deg tmurt n leqbayel d imdanen : mi bɣan ad teḥmu, ad ceɛlen times, mi bɣan ad tismiḍ, ad tt-ssexsin. Ula deg taddart n’’Tazrout’’, tekker ‘’tmes’’ deg lǧameɛ ass-nni n lɛid. Ugin-asen i kra n yisalafiyen ad d-kecmen ɣer daxel n lǧameɛ. Usan-d deg seg tudrin-nniḍen. Yewwi-ten-id yiwen ɣer din. Wigi, snen-ten aṭas n yimdanen : d imṭurfa.