Seg zik ssran lɣaci i usnulfu. D lɛali fell-asen ma ufan kra n tɣawsa, neɣ n ttawil swayes ara xedmen i yiman-nsen abeddel. Meḥsub, amaynut ilaq ad yettili deg ddunit d tudert n umdan, ladɣa ma irennu-as-d abaɣur, yettakk-as tagnit ad yekcem deg wayen ur yekcim. Acu kan, tikwal, amaynut-nni igellu-d s temḍerrit i yiwen. Ad as-d-yawi kra s tidet, maca ad as-yawi kra-nniḍen, ad as-t-yesfeḍ seg tilin. Ma neddem-d amedya seg wayen i d-yettnulfayen, akken ad kksen ayen i d-yennernan send-is, i d-yettwawfen yella yakan, ad nefren tizeɣwa n tmeɣriwin. Aṭas-aya segmi ttwabnant, llant, heggant tzeɣwa-agi. Xilla n yimdanen i yumren yis-sent, yal mi ara asen-d-tas tegnit ttruḥun xeddmen timeɣriwin-nsen dinna. Qeddac n tmentilin i yeǧǧan lɣaci-agi ttanfen i tmeɣra deg yixxamen-nsen, ttbeddilen-tt s tzeqqa-nni. Llan smenyifen tazeqqa, acku din i yufan akk ayen bɣan; dduzan, listaɛ, iqeddacen, adeg i yelhan, i yettirriqen s ccbaḥa… Yettusemma, d amkan i iwulmen kan i tegnatin n lferḥ, ur yelli wayen ixussen deg-s. Llan ttexṭirin-tt daɣen, imi dinna ahat ur yettaf yiwen tilelli i walbaɛḍ n lɛadat i yennum yesɛa-tent, ixeddem-itent deg uxxam-is netta, neɣ deg uxxam n win i as-d-iqerben. Seg yiwet n tama d lɛali ma yemmug wannect-nni merra, yeɣli-d deg yifassen n wid i t-iḍefren, i t-yeḥwaǧen. Lameɛna seg tama nniḍen, ur d lɛali. Ma nmugel ɣer yigemmaḍ i d-ttakkent tzeɣwa-nni, ad naf d akken tekksen kra seg wansayen-nneɣ iqburen, wid i aɣ-d-ǧǧan yimezwura. «tizeɣwa n tmeɣriwin, d amaynut i yekksen ini ucbiḥ i tmeɣra tazwawt i yesɛan zik sser… Nekka-d akk i wansayen-nneɣ icebḥen s wadda, la ten-nessengar yiwen yiwen, zun neɣli-d seg yigenni, ur nesɛi la amezruy, la lasel. Nugi ad nissin ansi d-nekka am nekni am yigduden n umaḍal… D asḥissef ameqqṛan». I d-yenna Dda Mbarek seg Tizi Uzzu. Ihi, tameɣra, ma temmug deg uxxam n bab-is, ad telhu ugar s leɛwayed tiẓiḍanin am tgella n yinebgawen, ccna n tlawin s ubendayer d udebber iwatan am win n zik… Wamma tameɣra deg tzeqqa, tettwaxdam s wayen i d-yettwaḥefḍen seg tmura-nniḍen, s wayen i aɣ-yexḍan nekni s yizwawen. Amek ara yili waddad ma tkemmel akka? Sani nteddu ad newweḍ? Amek ara d-neggri azekka? Kra seg wayen niqal nekseb-it, nettabaɛ-it akkit, nesruḥ seg-s kra. Ula d ass-a, aql-aɣ nezmer ad nernu tiyita i yidles-nneɣ imi mazal-aɣ nleḥḥu deg ubrid n uɣlaḍ. Ur nessin d acu i aɣ-d-yettakken, neɣ d acu i aɣ-iteffren ayen i yeɣlayen fell-aneɣ. Daymi nessaram amer zun ad nesfaydi seg umaynut, war astehzi deg uqbur.
Kaisa Khalifi