Aṭas i sɛeddan deg tallit yezrin wid iḥemmlen amaḍal uhlis n Internet. Imi tuqqna (la connexion) tezga d tin ixussen, d tasellawt, ɣur yimdanen s umata, ladɣa imesdurar. Ala win izedɣen deg waɣir (tamdint), neɣ yesɛan tagnit yemmug-as-d lxiḍ n ADSL, i yesnuffsen cwiṭ deg tmerwin n yiseggasen iɛeddan. Ma d wid-nniḍen, ckunṭṭḍen kan deg kra n wallalen n Tcinet (La Chine), am yimudimen-nni iberkanen, swayes xersum ad ḍillen d aḍilli ɣef umaḍal amaynut. Ulamma tesɛa tmurt tizemmar ad tgerrez aṭas n tlufa, acu kan almi d 2014 i tebda tetiknulujit n 3G tleḥḥu mi d-uɣen yimahalen (opérateurs) n tilifun turagt i usefti deg umaynut-a n tsuta tis kraḍ. Tebda tettwaseqdac tetiknulujit-a s waṭas sɣur yimsaɣen, ɣas s ssuma teɣlay ciṭṭuḥ, maca drus i yerran ddhen i waya sdat n tiẓin ɣer tuqqna ara ten-yeǧǧen ad azlen cwiṭ deg uḥufu-nsen. Dɣa, mi rnan ɛeddan kra n wayyuren seg userreḥ n tsuta tis kraḍ, terna tessaweḍ-d Lezzayer Tilikum amaynut n tuqqna n tsuta tis ukuẓ (4G), i tesenz nettat s timmad-is. Dindin, acḥal i irewlen sɣur Dezzy, Oredoo , neɣ Mobilis, ruḥen uɣen-d imudimen-nni i ara asen-yefken ad qqnen s tuqqna twata rnu s ssuma meɛqulit cwiṭ. Imir-nni, ahat, rfan yimahalen-nniḍen seg tsertit n Lezzayer Tilikum, maca, taggara-a kan, atan tefka-asen ula i nutni ttesriḥ ma bɣan ad jiren deg tsuta-a tatrart. Dɣa, ɣas amek segmi i tt-yeɛreḍ umahal n Oredoo deg yiwet seg twilayin n tmurt.
Mhenni Khalifi