Smana iɛeddan i d-smektan yimezdaɣ n Wat Yiraten agrawliɣ ameqqran Abane Ramdane. D yiwen i isebblen ṛuḥ-is ɣef tmurt n Lezzayer .
D netta i d-ixelqen agraw n Ṣsumam ass n 20 deg ɣuct 1956. Agraw –agi, iswi-nsen ad siwḍen ad yili udabu aserti : yal yiwen d acu ara yeṭṭef d wacu ara iseddu. Ama deg tsertit, tujjya, isalen, asefrek d waṭas n yiḥricen icudden ɣer tmetti tazzayrit sumata mgal acengu afransis. Ilaq ad ilint seddis (6) n lwilayat , yal tawilayt ad tebḍu ɣef ukkuz (4) n tamiwin , yal tama s ukkuz n yiḥricen. Sɛan tin iwumi qqaren lkatiba (bataillon) d 120 iserdasen (hommes armés). Yebɣa ad iseggem yakk iḥricen s wudem aserti . Ttekin deg ugraw–agi 34 n wudmawen gar-asen sin yigrawen yal agraw yella deg-s 17 iwudam. Ad d-nebder, gar-asen krim Belkacen, Amar Ouamrane, Si Mhamed Bouguerra, Yousef Zighoud , Lekhdar Bentoubal , Slimane Dehiles, Azeddine (commandant), Si Lekhder, Ali Khoudjaa, Ali Mellah, Amar Ait Chikh, yemmut uqbel s tẓa wussan (9 wussan), Mustapha Ben Boulaid, yemmut daɣen uqbel s semmus n wayyuren ( 5 wagguren) . Agraw n Ṣsumam, xedmen-t deg taddart n Iɣban d Ifri , tura d taɣiwant n Uzellagen. Akken bdant temsal ttseggiment, yebda Abane Ramdane, yettaweḍ ɣer yiswi-s, maca ziɣ llan wid yusmen deg-s imi d bu tebɣest , yeḥrec, yesuffeɣ ṛṛay. Qecmen-t yiɛdawen n tudert deg useggas n 1957 deg tmurt n Lmarruk , ad t-yerḥam Rebbi. Ɣef waya ur nezmir ara ad d-nemmeslay ɣef ugraw n Ṣsumam mebla ma nebder-d Abane Ramdane, win ur t-nessin ara , ilul ass n 10 deg yunyu aseggas 1920 deg Yiɛezuzen , taɣiwant n Larbɛa n At Yiratenn Tizi Uzzu. D yiwen ikufḥen s wallaɣ , s tiḥerci, s tayri n tmurt abeɛda iḥemmel tamurt n Leqbayel am akken i d-yenna deg wawal-is ‘’Nekkni d yiwet n ccetla ur telli di ccerq ur telli deg lɣerb, d Imaziɣen d ccetla qlilen, imi ayen qlilen yettiɛziz.’’ihi, Abane, ur yeḥbis ara amennuɣ ɣef tmurt almi i t-seggden iseggaden n tafat, ayen i d-nnan fell-as drus.
Zakia Ben yahia