I lmend n usmekti n temlilit n Ṣummam 20 ɣuct 1956, akked ẓẓedmat n 20 ɣuct 1955, yettwasbed yiwen n usebdad i umeɣras d unaẓur Farid Ali, deg taddart-is n Ikhelounéne, i d-yezgan deg tɣiwant n Bounouh. Tella-d tejmilt-agi, tasebḥit n wass-nni n lhed yezrin 20 ɣuct 2017, deg taddart n Ikhelfounéne, yetabaɛen ɣer tɣiwant n Bounouh akked ladayra n Boughni, deg lwilaya n Tizi Uzzu. D tajmilt i ḥedren waṭas n yiwudam, gar-asen: Aɣella n ladayra n Boughni, aselway n Usqamu aɣerfan aɣiwan n Bounouh, imḍebbren n Usqamu aɣerfan n lwilaya, d waṭas n yimeddukkal-is d yifennanen. D leqdic adelsan s wazal-is, i d-heggan yimsuddsen-agi: Tasqamut n taddart n Ikhelfounéne s tallelt n Usqamu aɣerfan aɣiwan n Bounouh, Tuddsa taɣelnawt n yimjuhad n Bounouh, Asqamu aɣerfan n lwilaya n Tizi Uzzu, Tanmehla n yidles n Tizi Uzzu, Tiddukkla tadelsant Moh Said Oubelaid, akked Tesquma n tuddar yellin deg tɣiwant n Bounouh. Tebda tejmilt-agi, s yiwet n temsikent n yimagraden n tɣamsa yettwarun ɣef umjahed d ucennay-agi Farid Ali, d wayen akk yexdem ama deg ccna neɣ deg tegrawla tazzayrit 1954-1962. Syin akin xedmen akk wid yellan din ddqiqa n tsusmi ɣef rruḥ-s d lerwaḥ n ccuhada merra. Sakin d taɣuri n lfatiḥ sɣur ccix n lǧameɛ n taddart n Ikhelounéne. Syin ɣur-s d asersi n tmeqqunt n yijeǧǧigen ɣef uẓekka-s yellan deg tmeqbart n taddart. Ɣef 10h00 n ssbaḥ, tella-d tulya tunṣibt n usebdad yettwaxdamen i lmend-is deg tlemmast n taddart, uran fell-as ula d azwel n tezlit-nni “A yemma aɛzizen ur ttru” i yexdem d tajmilt i tlawin iwumi mmuten warraw-nsen deg tegrawla, yerna yis-s i yettwassen aṭas deg unnar n ccna. Azal n ssaɛa mebɛed, llant-d tnagiyin ɣef tudert d yimuhal n urgaz-agi meqqren yuran isem-is deg umezruy, ama s ccna-s neɣ s wayen yexdem deg ṭṭrad n 1954-1962. Yemmeslay-d fell-as aṭas umeddakkel-is deg uẓawan, wagi d Atmani, yenna-d fell-as: “ Ssneɣ-t deg Lezzayer tamanaɣt asmi yella ixeddem deg rradyu tis snat, deg tedwilt-nni n “Yicennayen n uzekka”. Yella d argaz lɛali, yettqadar aṭas medden, ala ayen yelhan swayes ttmeslayen medden fell-as. Am wakken diɣen i d-mmeslayen ɣef umecwar-is deg lfen yiwudam-nniḍen, yecban: Imawlan-is, imeddukkal-is, aselway n tesqamut n taddart n Ikhelfounéne, aḥbib-is n temẓi d ccna Mohamed Chemoune. Mi yezgen wass, tella-d lweɛda ɣef yimekli i wid akk iḥedren deg tejmilt-agi. Ɣef 14h00 n uzzal, yella-d usenɛet n yiwen n usaru awezzlan i d-ixedmen agzul i tmeddurt d lecɣal n Farid Ali…
yettkemmil
A. A