I tikkelt tamenzut i yella waya deg Tmurt n Yizwawen xersum. Seg wussan-a yezrin, iɛewwel-as umedyaz Lxeyyer Brahimi, seg tɣiwant n Ayt Smaɛel, i yiwet n tikti s wazal-is. Imi seg waṭas-aya mi d-iban wugur n tɣuri n yidlisen s tutlayt n Mulud At Mɛemmer, am wakken yella wugur n ufraq d usiweḍ, yekker-as mmi-s n Udrar n Fad i usenfar mu isemma: Tanedlist yettḥerriken (Librairie mobile).
Ulama ur yesɛi ttawil, am tkerrust, s uqeddic-a, yebɣa Lxeyyer ad yelḥu s leɛqel xersum aseggas amenzu: ad yettruḥu ɣer kra n temnaḍin d yimukan ideg ara d-iseffer sdat wallen n medden idlisen n tmaziɣt, neɣ n tezwawt, i d-yeffɣen sɣur yilemẓiyen n Ayt Smaɛel neɣ sɣur Tdukkla Tadelsant Adrar n Fad. Am wakken i iga dɣa abrid iɛeddan tama uneḥbus n yifurguyen deg Tregragt, akked tama uracuc n umazzer (cascade) n Kefrida.
«Seg tama-w, bɣiɣ ad xedmeɣ ayen yellan fell-i. Ad geɣ ayen i werɛad yemmug wissen ad d-nnulfun yimeɣriyen». S wawalen-a i aɣ-d-yerra umedyaz Lxeyyer ɣef wayen i d-iga d asenfar. Send ad d-yernu: «Akken yebɣu yella wugur deg ulmad n tutlayt, deg wayen akk jerrbeɣ, walaɣ yella wugur d ageɛmir deg-neɣ daɣen!».
S wakka, iɛewwel Lxeyyer ad yessiwiḍ idlisen alama d ifassen n wid i iḍulen deg tɣuri n wayla-nsen, imi ass-a deg wussan, yemmut dayen wawal-nni i d-yeqqar «ulac idlisen n tmaziɣt». Yennerna-d win i yettawin tafyirt n «d taɣuri i d leqrar n tmaziɣt».
I kra n win yebɣan adlis seg wid i d-yeffɣen deg Ayt Smaɛel, neɣ yettnadin ugar n yisallen ɣef umaynut-a, yezmer ad yessiwel i wuṭṭun-a: 07 73 28 30 96. Afud igerrzen i Lxeyyer !
Mhenni Khalifi