Ass-nni n larebɛa iɛeddan i aɣ-yeǧǧa Mass Mohamed Brahim Salhi, mebɛed mi yella yehlek acḥal aya. Yemmut deg sbiter Frantz Fanon n temdint n Blida.
Yella Mass Salhi d aselmad deg tesdawit n Tizi Uzzu, anda i d-yella d imḍebber amezwaru ɣef Ugezdu n tutlayt d yidles amaziɣ deg yiseggasen-is imezwura, syin yuɣal, diɣ, d imeḍebber deg Tamda. ilul Mohamed Brahim Salhi deg Tizi Uzzu deg useggas n 1952 anda yeɣra almi i iruḥ ɣer Lezzayer tamanaɣ anda i ikemmel amecwar-is n leqraya, deg tesdawit, ɣef tussniwin tisertanin deg yiseggasen n 1970. Syin ikemmel deg Fransa armi i d-yewwi Ductura-ines deg Sorbonne deg useggas n 2004. Mass Salhi, d amnadi u d amaru. Yella, yakan, d amnadi deg Crasc (centre de recherche en anthropologie sociale et culturelle). Yesɛa aṭas n tmussniwin akked tzemmar, ɣef waya, dɣa, i as-d-tessawel Massa Benghebrit, taneɣlaft n leqraya, i wakken ad asen-yefk afus n tallelt i uḥric-agi n ttrebga. Yura aṭas n yimagraden isdawanen akked yidlisen. Nezmer ad d-nader ‘’La tariqa Errahmania, de l’avènement à la resurrection de 1871’’, ‘’Algérie : citoyenneté et identité’’, dɣa, adlis-a aneggaru, yeffeɣ-d ɣer tezrigin Achab deg useggas n 2010, yewwi-d awal deg-s ɣef umussu aɣelnaw sumata, anda i d-yemmeslay s telqayt ɣef umussu adelsan amaziɣ (MCB) n 1980 akked d umussu n Leɛrac. Deg udlis-s, Mass Salhi, inuda s telqayt ɣef wamek yettnerni umussu aɣelnaw, ɣef wacu yettnadi d wacu i t-yeǧǧan ad d-ilal. Yeɛreḍ ad d-yesbin assaɣen d umgarad yellan gar umussa n zik akked umussu i d-yeslalen win n 1980, ladɣa, seg tama-agi n tmagit (l’identité) akked tmetti. Iga tadiwennit d tameqqrant, deg udlis-a, akked wid yellan deg umussu n 1980. Yextar ad d-yawi awal akked Said Khelil d Oussalem Mohand Ouamar i mazal ar tura yesselmad deg tesdawit n Tizi Uzzu(yesselmed tamaziɣt mebla lexlas deg tesdawit). Yedder Mass Salhi tidyanin akk i iɛeddan deg tmurt n leqbayel : seg tmanyin armi d amussu n leɛrac, daymi i yella udlis-agi-ines d inigi n tidet ɣef snat n tedyanin-agi. Adlis-a, yella-d, diɣ, d tazrawt ɣef ubrid i d-yewwi umussu aɣelnaw akked unkar n yidles amazɣ s umata. S leqraya n udlis ‘’Algérie : citoyenneté et identité’’ i nezmer ad as-nerr tajmilt i Mass Salhi. Gen deg talwit a Mass.
Hocine.Moula